May-ada ka ba kilala nga Saksi ni Jehova? Bangin an pipira ha amon imo amyaw, katrabaho, kaklase, o bangin nakaistorya mo na mahitungod ha Biblia. Hin-o gud ba an mga Saksi, ngan kay ano nga iginsasangyaw namon an amon gintotoohan?

Ordinaryo la nga mga tawo. Magkalain-lain an amon gintikangan ngan kahimtang ha sosiedad. An iba ha amon tikang ha lain nga relihiyon, samtang an iba diri natoo ha Dios hadto. Kondi antes kami nagin Saksi, ngatanan kami nag-usisa hin maopay han igintututdo han Biblia. (Buhat 17:11) Hinbaroan namon an kamatuoran, ginkarawat ito, ngan personal nga nagdesisyon ha pagsingba kan Jehova nga Dios.

Nagpapahimulos ha pag-aram han Biblia. Pariho ha iba, kinahanglan gihap namon atubangon an amon mga problema ngan mga kaluyahan. Pero pinaagi ha pag-aplikar han mga prinsipyo ha Biblia kada adlaw, nag-uswag gud an klase han amon kinabuhi. (Salmo 128:1, 2) Usa ito han rason kon kay ano nga iginsusumat namon ha iba an mag-opay nga butang nga amon hinbaroan tikang ha Biblia.

Nagkikinabuhi uyon han mga prinsipyo tikang ha Dios. An mga prinsipyo nga igintututdo ha Biblia nag-aaghat ha pagbuhat kon ano an makakaopay ha aton ngan kon paonan-o tatahuron an iba, upod na an mga kalidad sugad ha pagin tangkod ngan pagin buotan. Nabulig ini basi kita magin responsable ngan maopay nga membro han sosiedad, ngan nag-aaghat liwat ini hin pagkaurosa han pamilya ngan hitaas nga moralidad. Tungod kay kombinsido kami nga ‘an Dios waray ginpapasulabi,’ an amon organisasyon ginkukompwesto hin mga tawo nga iba-iba an nasyonalidad, kondi waray diskriminasyon. Ngan bisan kon ordinaryo la an kada tagsa ha amon, diri ordinaryo an amon organisasyon.—Buhat 4:13; 10:34, 35.

• Ano an kaparihoan han mga Saksi ni Jehova ha iba nga mga tawo?

• Ano nga mga prinsipyo an hinbaroan han mga Saksi ha ira pag-aram han Biblia?