Basi maipasamwak an “Maopay nga Sumat” ha “ngatanan nga nasud ngan panon, ngan yinaknan ngan katawohan,” nagpupublikar kami hin mga literatura ha mga 700 nga yinaknan. (Pahayag 14:6) Paonan-o namon ito ginbubuhat? Pinaagi han bulig han mga parasurat ngan mga 3,300 nga parahubad ha iba-iba nga nasud—ngatanan mga Saksi ni Jehova.

An orihinal nga artikulo igin-aandam ha Ingles. An Nagmamando nga Lawas an nangunguna han mga buruhaton han Writing Department ha amon headquarters. Gin-oorganisar hini nga departamento an mga toka han mga parasurat ha headquarters ngan ha pipira nga sanga nga opisina. Tungod kay iba-iba nga nasud an gintikangan han amon mga parasurat, nahihisgotan ha amon mga publikasyon an mga topiko nga naruruyagan han mga tawo anoman an ira nasyonalidad o kultura.

An artikulo iginpapadara ha mga parahubad. Katapos ma-edit ngan maaprobahan an artikulo, iginpapadara ito pinaagi ha kompyuter ha mga parahubad ha iba-iba nga bahin han kalibotan basi mahubad, ma-check, ngan ma-proofread. Nangangalimbasog hira ha pagpili hin husto nga “mga pulong han kamatuoran” ha ira yinaknan nga haom ha kahulogan han Ingles.—Eklesiastes 12:10.

Ginpapadagmit han kompyuter an proseso. Diri masasaliwanan han kompyuter an mga tawo nga parasurat ngan parahubad. Pero napapadagmit hito an ira buruhaton pinaagi hin mga diksyonaryo ngan mga program ha kompyuter ha pagsaliksik. Nagdisenyo liwat kami nga mga Saksi hin program nga gintatawag nga Multilanguage Electronic Publishing System (MEPS) diin puydi isulod an artikulo ha ginatos nga yinaknan, mabutangan hin artwork, ngan ma-compose basi maimprinta.

Kay ano nga nangangalimbasog kami buhaton ini ngatanan, bisan ha mga yinaknan nga diri damu an nagamit? Tungod kay kaburut-on ni Jehova nga ‘an ngatanan nga tawo maluwas, ngan makadangat ha pagkilala han kamatuoran.’—1 Timoteo 2:3, 4.

• Paonan-o gin-aandam an amon mga publikasyon?

• Kay ano nga iginhuhubad namon an amon mga literatura ha damu nga yinaknan?