An termino nga “payunir” agsob nga nagtutudlok ha usa nga namimiling hin bag-o nga mga teritoryo ngan nag-aabri hin dalan kon diin mahimo sumunod an iba. Hi Jesus masisiring nga payunir tungod kay ginpakanhi hiya ha tuna basi tikangan an ministeryo nga nagluluwas hin kinabuhi ngan abrihan an dalan ngadto ha kaluwasan. (Mateo 20:28) Pariho kan Jesus, daku nga oras an igin-gagahin han iya mga sumurunod yana ha ‘panhimo hin tinon-an.’ (Mateo 28:19, 20) Ngan nagdesisyon an iba nga mag-alagad sugad nga payunir.

An payunir usa ka bug-os-panahon nga magsarangyaw. An ngatanan nga Saksi nagsasangyaw han maopay nga sumat. Kondi gin-organisar han iba ha ira an ira buruhaton basi makag-regular payunir. Naggagahin hira hin 70 ka oras ha pagsangyaw kada bulan. Basi mabuhat ini, damu ha ira an part-time la an trabaho. An iba liwat ginpili sugad nga espesyal payunir ha lugar nga mas daku an panginahanglan hin magsarangyaw, ngan naggagahin hin 130 ka oras o sobra pa kada bulan ha ministeryo. Simple an kinabuhi han mga payunir kondi kontento ngan nasarig nga itatagana ni Jehova an ira panginahanglan. (Mateo 6:31-33; 1 Timoteo 6:6-8) An iba nga diri nakakagpayunir hin bug-os-panahon puydi mag-auxiliary payunir. Hira naggagahin hin 30 o 50 ka oras ha ministeryo ha usa ka bulan.

An payunir naaaghat han gugma ha Dios ngan ha tawo. Pariho kan Jesus, nakikita namon an makalolooy nga kahimtang ha espirituwal han mga tawo yana. (Markos 6:34) Pero may-ada kami han kahibaro nga makakabulig ha ira yana, ngan makakahatag hin marig-on nga paglaom ha tidaraon. Gugma ha igkasi-tawo an nag-aaghat ha payunir ha paghatag han iya panahon ngan kusog ha pagbulig ha iba ha espirituwal. (Mateo 22:39; 1 Tesalonika 2:8) Sugad nga resulta, napaparig-on an iya pagtoo, nagigin mas duok ha Dios, ngan nagigin mas malipayon.—Buhat 20:35.

• Ano an payunir?

• Ano an nag-aaghat ha iba nga magpayunir?