Ha sulod hin mga dekada gin-gamit, gin-imprinta, ngan ginpanaltag han mga Saksi ni Jehova an iba-iba nga bersyon han Biblia. Kondi nakita namon an panginahanglan ha paghimo hin bag-o nga bersyon nga mas makakabulig ha pagkaada husto nga kahibaro han “kamatuoran,” nga amo an kaburut-on han Dios para ha ngatanan. (1 Timoteo 2:3, 4) Salit han 1950, nagtikang kami pagpublikar, gamit an moderno nga yinaknan, han pipira nga bahin han Biblia—an New World Translation. Ini nga Biblia husto nga iginhubad ngadto ha sobra 120 nga yinaknan.

Panginahanglan hin Biblia nga masayon hisabtan. Nagbabag-o an yinaknan ha paglabay han panahon, ngan damu nga bersyon han Biblia an may mga termino nga diri na ginagamit ngan makuri masabtan. Dugang pa, nadiskobrehan an kadaan nga mga manuskrito nga mas husto ngan mas hirani ha orihinal, salit nagin mas masayon an pagsabot ha Hebreo, Aramaiko, ngan Griego nga mga teksto.

Panginahanglan hin Biblia nga ginhubad uyon gud ha pulong han Dios. Imbes nga balyoan an ginsisiring han Pulong han Dios, an mga parahubad han Biblia sadang magin maunungon ha orihinal nga manuskrito hito. Pero an kadam-an nga bersyon han Biblia diri nagamit han ngaran han Dios—Jehova.

Panginahanglan hin Biblia nga nagpapasidungog han Awtor hito. (2 Samuel 23:2) Ha New World Translation iginbalik an ngaran nga Jehova ha dapit diin orihinal nga nakikita ito hin mga 7,000 ka beses ha pinakakadaan nga manuskrito han Biblia, sugad pananglitan han makikita ha ubos. (Salmo 83:18) Makalilipay basahon ini nga Biblia nga produkto hin damu ka tuig han maduruto nga pag-research tungod kay matin-aw nga nagsusumat ito han panhunahuna han Dios. May-ada man ha iyo pinulongan New World Translation o waray, gin-aaghat ka namon nga batasanon an pagbasa han Pulong ni Jehova kada adlaw.—Josue 1:8; Salmo 1:2, 3.

• Kay ano nga ginhunahuna namon nga kinahanglan an bag-o nga bersyon han Biblia?

• Ano an maopay buhaton han naruruyag mahibaro han kaburut-on han Dios?