¿Baʼaxten u kʼáat Jéeoba ka a kʼaj óolt tubeel? Tumen u yojleʼ wa ka kʼaj óoltik bix u modos, bix u tratartik u maasil yéetel ka wojéeltik le baʼaxoʼob ku prometerkoʼ jeʼel u taaktal a beetkaba u amigoeʼ. Chéen baʼaleʼ, ¿jach wa tu jaajil jeʼel u páajtal a beetkaba u amigo Dioseʼ? (Xok Salmo 25:14). ¿Baʼax unaj a beetik utiaʼal ka béeyak leloʼ? Le Bibliaoʼ ku yaʼaliktoʼon baʼax unaj k-beetik. Tsʼoʼoleʼ ku yaʼalik xan toʼon baʼaxten jach kʼaʼabéet k-bisikba yéetel Jéeoba.

1. ¿Baʼax u kʼáat Jéeoba ka a beete?

Le Bibliaoʼ ku yaʼalik: «Natsʼabaʼex tu yiknal Dios, letiʼ túuneʼ bíin u natsʼuba ta wiknaleʼex» (Santiago 4:8). Le tʼaanoʼobaʼ ku yeʼeskoʼobeʼ Jéeobaeʼ u kʼáat ka a bisaba tu yéetel. Yaan máaxoʼob tuklikeʼ maʼ tu páajtal u biskubaʼob yéetel Dios tumen maʼ tu páajtal u yilkoʼob. Chéen baʼaleʼ letiʼeʼ tu beetaj u tsʼíibtaʼal u jatsʼuts modos teʼ Biblia utiaʼal ka taakchajak k-natsʼikba tiʼ letiʼoʼ. Kéen k-xok teʼ Biblia le baʼax ku yaʼaliktoʼon Jéeobaoʼ k-maas bisikba tu yéetel kex maʼ tu páajtal k-ilik.

2. ¿Baʼaxten Jéeobaeʼ letiʼe maas maʼalob amigo jeʼel u yantaltoʼonoʼ?

Minaʼan uláakʼ máax jach u yaabiltmech jeʼex Jéeobaeʼ. U kʼáat ka yanaktech kiʼimak óolal yéetel ka a kaxt u yáantaj. Le Bibliaoʼ ku yaʼalik: «Pʼateʼex tu kʼab Dios tuláakal le kuuch chiʼichnakkúuntikeʼexoʼ, tumen letiʼeʼ jach taak u yáantkeʼex» (1 Pedro 5:7). Jéeobaeʼ jach ku tsʼíiboltik u yáantik u amigoʼob, u líiʼsik u yóoloʼob yéetel u chʼenxikintik baʼax ku yaʼalikoʼob (xok Salmo 94:18, 19).

3. ¿Baʼax ku páaʼtik Jéeoba ka u beet u amigoʼob?

Jéeobaeʼ u yaabiltmaj tuláakal máak, pero «jach ku biskuba maʼalob yéetel le máaxoʼob toj u kuxtaloʼoboʼ» (Proverbios 3:32). Letiʼeʼ u kʼáat ka beetaʼak le baʼaloʼob maʼalobtak ku yaʼalikoʼ yéetel ka pʼektaʼak le baʼax u pʼeek xan letiʼoʼ. Maʼ xaaneʼ yaan máax tuklikeʼ mix bikʼin kun páajtal u beetik le baʼax ku yaʼalik Jéeobaoʼ. U maʼalobileʼ letiʼeʼ ku naʼatik bix k-uʼuyikba yéetel ku kʼamik le máaxoʼob u kʼáat u beetoʼob baʼax uts tu tʼaanoʼ (Salmo 147:11; Hechos 10:34, 35).

 UTIAʼAL A MAAS NAʼATIK

4. Abrahán kaʼacheʼ u amigo Jéeoba

Le baʼax ku yaʼalik le Biblia yoʼolal Abrahán wa Abránoʼ ku yeʼesik baʼax ku páaʼtik Jéeoba tiʼ u amigoʼob. Xokeʼex baʼax ku yaʼalaʼal yoʼolal Abrahán tiʼ Génesis 12:1-4, kéen tsʼoʼokkeʼ ka tsikbaltikeʼex lelaʼ:

• ¿Baʼax tu yaʼalaj Jéeoba tiʼ Abrahán ka u beete?

• ¿Baʼax tu yaʼalaj Jéeoba ken u tsʼáa tiʼ?

• ¿Baʼax tu beetaj Abrahán ka tsʼoʼok u yaʼalaʼaltiʼ baʼax ken u beete?

5. ¿Baʼax ku yaʼalik Jéeoba ka u beet u amigoʼob?

Yaan kʼiineʼ k-páaʼtik ka beetaʼak wa baʼax t-oʼolal tumen k-amigoʼob.

• Techeʼ, ¿baʼax ka páaʼtik ka u beet a amigoʼob ta woʼolal?

Xokeʼex 1 Juan 5:3, kéen tsʼoʼokkeʼ ka tsikbaltikeʼex lelaʼ:

• ¿Baʼax u kʼáat Jéeoba ka u beet u amigoʼob?

Utiaʼal k-beetik baʼax ku yaʼalik Jéeobaeʼ maʼ xaaneʼ yaan u kʼaʼabéettal k-kʼexik jujunpʼéel baʼaloʼob ichil k-kuxtal. Xokeʼex Isaías 48:17, 18, kéen tsʼoʼokkeʼ ka tsikbaltikeʼex lelaʼ:

• ¿Baʼaxten Jéeobaeʼ ku kʼáatik tiʼ u amigoʼob ka u kʼexoʼob jujunpʼéel baʼaloʼob ichil u kuxtaloʼob?

 6. Jéeobaeʼ ku yáantik u amigoʼob

 BAʼAX TSOʼOLI

Jéeobaeʼ u kʼáat ka a beetaba u amigo yéetel yaan u yáantkech utiaʼal ka a bisaba tu yéetel.

Baʼax ta kanaj

• ¿Bix u yáantik Jéeoba u amigoʼob?

• ¿Baʼaxten ku yaʼalik Jéeoba tiʼ u amigoʼob ka u kʼex jujunpʼéel baʼaloʼob ichil u kuxtaloʼob?

• A tuklikeʼ, ¿yaʼab wa baʼax ku kʼáatik Jéeoba tiʼ u amigoʼob?