XOOK 41
¿Baʼax ku yaʼalik le Biblia yoʼolal le sexooʼ?
Yaʼab máakoʼobeʼ suʼlakoʼob tʼaan yoʼolal sexo. Chéen baʼaleʼ le Bibliaoʼ le kéen tʼaanak yoʼolal sexoeʼ claro u tsolik, tsʼoʼoleʼ ku beetik yéetel respeto. Le baʼax ku yaʼalik le Bibliaoʼ jach jeʼel u yáantkoʼoneʼ tumen le máax beet u tsʼíibtaʼaloʼ Jéeoba, le Máax Beetmiloʼonoʼ. Letiʼeʼ ku yaʼaliktoʼon bix jeʼel u bintoʼon maʼalobileʼ, bix jeʼel u kiʼimaktal k-óoleʼ yéetel bix jeʼel k-kiʼimakkúuntik u yóoleʼ.
1. ¿Bix u yilik Jéeoba le relaciones sexualesoʼ?
Le relaciones sexualesoʼ junpʼéel baʼax u siimaj Jéeoba tiʼ le xiib yéetel le koʼolel tsʼokaʼan u beeloʼoboʼ. Le relaciones sexualesoʼ maʼ chéen tsʼaʼan utiaʼal ka yanak u paalal máakiʼ, baʼaxeʼ tsʼaʼan xan utiaʼal ka páajchajak u yeʼesik yaabilaj le máaxoʼob tsʼokaʼan u beeloʼoboʼ. Le oʼolal le Bibliaoʼ ku yaʼalik: «Kiʼimakkúunt a wóol yéetel le koʼolel tsʼoʼok a beel tu yéetel ta táankelmiloʼ» (Proverbios 5:18, 19). Jéeobaeʼ ku páaʼtikeʼ le máaxoʼob tsʼokaʼan u beeloʼoboʼ maʼ u tusik u núupoʼob (xok Hebreos 13:4).
2. ¿Baʼax le núupkʼebanoʼ?
Le Bibliaoʼ ku yaʼalikeʼ le máaxoʼob ku núupkʼebantaloʼoboʼ «maʼ ken u tiaʼalintoʼob u Reino Dios» (1 Corintios 6:9, 10). Le máaxoʼob tsʼíibt le Bibliaoʼ meyajnajtiʼob le tʼaan griego pornéia utiaʼal u tʼaanoʼob tiʼ le núupkʼebanoʼ. Ichil le tʼaanaʼ táakaʼan 1) u yantal relaciones sexuales ichil kaʼatúul máaxoʼob maʼ tsʼokaʼan u beeloʼobiʼ, a 2) u yantal relaciones sexuales tiʼ máak yéetel baʼalcheʼ 3) bey xan le homosexualidadoʼ. Wa k-náachkuntikba tiʼ le núupkʼebanoʼ yaan k-kiʼimakkúuntik u yóol Jéeoba yéetel yaan u bintoʼon maʼalobil (1 Tesalonicenses 4:3).
UTIAʼAL A MAAS NAʼATIK
Koʼox ilik baʼax jeʼel u yáantkech utiaʼal maʼ a lúubul tiʼ núupkʼebaneʼ yéetel baʼax utsiloʼob jeʼel a kʼamik wa maʼ ta beetik le baʼaxoʼob u pʼekmaj Diosoʼ.
3. Náachkuntaba tiʼ le núupkʼebanoʼ
José, juntúul máax jach chúukpaj u yóol tiʼ Dioseʼ, jach tu kanáantaj maʼ u lúubul tiʼ núupkʼeban. Xokeʼex Génesis 39:1-12, kéen tsʼoʼokkeʼ ka tsikbaltikeʼex lelaʼ:
-
¿Baʼaxten púutsʼ José? (Ilawileʼex versículo 9).
-
¿Maʼalob wa le baʼax tu beetaj Joséoʼ? ¿Baʼaxten ka tuklik leloʼ?
Le táankelmoʼoboʼ, ¿bix jeʼel u púutsʼloʼob tiʼ le núupkʼeban jeʼex tu beetil Joséoʼ? Chaʼanteʼex le VIDEOOʼ.
Jéeobaeʼ u kʼáat ka púutsʼkoʼon tiʼ le núupkʼebanoʼ. Xokeʼex 1 Corintios 6:18, kéen tsʼoʼokkeʼ ka tsikbaltikeʼex lelaʼ:
-
¿Tiʼ baʼax súutukiloʼob jeʼel u lúubul máak tiʼ núupkʼebaneʼ?
-
Techeʼ, ¿bix jeʼel a púutsʼul tiʼ le núupkʼebanoʼ?
4. Jeʼel u páajtal a púutsʼul tiʼ le núupkʼebanoʼ
¿Baʼax jeʼel a beetik utiaʼal maʼ a lúubul tiʼ núupkʼebaneʼ? Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
Le sukuʼun jóokʼ teʼ videooʼ tu tsʼáaj cuentaeʼ yoʼolal le baʼaxoʼob ku tuklik yéetel ku beetkoʼ jeʼel u tusik u yataneʼ. ¿Baʼax tu beetaj utiaʼal maʼ u lúubul tiʼ núupkʼeban?
Tak le máaxoʼob úuch joʼopʼok u meyajtikoʼob Jéeobaoʼ kʼaʼabéet u jach kanáantkoʼob maʼ u tuukuloʼob tiʼ baʼaloʼob kʼaastak. ¿Baʼax jeʼel a beetik utiaʼal maʼ a tuukul tiʼ baʼaloʼob yaan yil yéetel núupkʼebaneʼ? Xokeʼex Filipenses 4:8, kéen tsʼoʼokkeʼ ka tsikbaltikeʼex lelaʼ:
-
¿Tiʼ baʼaxoʼob maʼalob ka tuukulnakoʼon?
-
Wa ka xokik le Biblia yéetel ka tsʼáaik a wóol a meyajt Jéeobaeʼ, ¿jeʼel wa u yáantkech utiaʼal maʼ a lúubul tiʼ junpʼéel tentacióneʼ? ¿Baʼaxten?
5. Ku taasik utsil u beetaʼal baʼax ku yaʼalik Jéeoba
Jéeobaeʼ u yojel baʼax jeʼel u taasiktoʼon utsileʼ. Le oʼolal ku yaʼalik bix jeʼel u pʼáatal limpioil k-kuxtaleʼ yéetel baʼax utsiloʼob jeʼel u taasiktoʼoneʼ. Xokeʼex Proverbios 7:7-27 yéetel chaʼanteʼex le VIDEOOʼ. Kéen tsʼoʼokkeʼ ka tsikbaltikeʼex lelaʼ:
-
¿Baʼaxten k-aʼalikeʼ le xiʼipaloʼ maʼ náachchaj tiʼ le núupkʼebanoʼ? (Ilawileʼex Proverbios 7:8, 9).
-
Jeʼex u yaʼalik Proverbios 7:23, 26, ¿baʼax problemasil ku yantal tiʼ le máaxoʼob ku núupkʼebantaloʼoboʼ?
-
Wa k-kanáantikba tiʼ le núupkʼebanoʼ, ¿baʼax bendicióniloʼob jeʼel k-kʼamik ichil junpʼíit kʼiineʼ?
Yaan máax tuklikeʼ le Bibliaoʼ ku beetik u pʼektaʼal le homosexualoʼoboʼ. Pero u jaajileʼ Jéeobaeʼ u yaabiltmaj tuláakal máak yéetel u kʼáat ka yanak kuxtal minaʼan u xuul tiʼob. Utiaʼal leloʼ kʼaʼabéet u beetik máak baʼax ku yaʼalik le Bibliaoʼ. Xokeʼex 1 Corintios 6:9-11, kéen tsʼoʼokkeʼ ka tsikbaltikeʼex lelaʼ:
-
¿Chéen wa le baʼax ku beetik le homosexualoʼob maʼ maʼalob u yilik Diosoʼ?
Utiaʼal k-lúubul utsil tiʼ Dioseʼ tuláakloʼon unaj k-beetik kʼeexoʼob ichil k-kuxtal. ¿Ku valer wa u penail u beetik máak? Xokeʼex Salmo 19:8, 11, kéen tsʼoʼokkeʼ ka tsikbaltikeʼex lelaʼ:
-
¿Maʼalob wa le baʼax ku yaʼalik Jéeoba ka beetaʼakoʼ? ¿Baʼaxten bey a waʼalikoʼ?
Jéeobaeʼ tsʼoʼok u yáantik yaʼab máakoʼob u kʼex u kuxtaloʼob, letiʼeʼ jeʼel xan u yáantkecheʼ
BAʼAX SUUK U YAʼALAʼAL: «Maʼ kʼaas ka yanak relaciones sexuales tiʼ kaʼatúul máaxoʼob u yaabiltmubaʼobiʼ».
-
Techeʼ, ¿baʼax jeʼel a waʼalikeʼ?
BAʼAX TSOʼOLI
Le relaciones sexualesoʼ junpʼéel siibal u tsʼaamaj Jéeoba utiaʼal juntúul xiib yéetel juntúul koʼolel tsʼokaʼan u beeloʼob.
Baʼax ta kanaj
-
¿Baʼaxoʼob táakaʼan ichil le núupkʼebanoʼ?
-
¿Baʼax jeʼel u yáantkoʼon utiaʼal maʼ k-lúubul tiʼ núupkʼebaneʼ?
-
¿Baʼax utsil ku taasik tiʼ máak u beetik baʼax ku yaʼalik Jéeoba?
KAN U MAASIL
Ilawil baʼaxten Dioseʼ u kʼáat ka tsʼoʼokok u beel le xiib yéetel le koʼolel chéen múul kajaʼanoʼoboʼ.
«¿Baʼax ku yaʼalik le Biblia yoʼolal le máaxoʼob chéen múul kajaʼanoʼoboʼ?» (Xok teʼ jw.org)
Le Bibliaoʼ maʼ tu yaʼalik ka pʼektaʼak le homosexualoʼoboʼ. Xok baʼax ku yaʼalik tu yoʼolaloʼob.
Le baʼax ku yaʼalik le Biblia yoʼolal le relaciones sexualesoʼ ku kanáantik máak. Ojéelt baʼaxten.
«Le sexo oraloʼ, ¿láayliʼ wa relaciones sexualeseʼ?» (Xok teʼ jw.org)
Le xook «Tu yeʼesoʼobten utsil» ku yaʼalik baʼax áant juntúul homosexual u kʼex u kuxtal.
«Kʼeʼex u kuxtaloʼob tumen le Bibliaoʼ» (U Pʼíich Tulumil Kanan, 1 tiʼ julio tiʼ 2011)
a Ichil le núupkʼebanoʼ táakaʼan sexo oral, sexo anal yéetel u báaxtik máak u xiibil wa u x-chʼuupil yaanal máak utiaʼal u masturbartik.
Maʼ xaaneʼ jeʼel u yutstal xan ta wicheʼ
KʼÁATCHIʼOB SUUK U BEETAʼAL
¿Bix u tsʼáaikoʼob xook u testigoʼob Jéeoba yéetel le Bibliaoʼ?
Le xook ku tsʼáaik u testigoʼob Jéeobaoʼ gratis, jeʼel u páajtal a usartik a Bibliaeʼ yéetel jeʼel u páajtal a invitartik wa máax utiaʼal u láakʼintikech teʼ xookoʼ.
