Yaan máaxoʼobeʼ taak u yojéeltikoʼob

¿Yaan wa u xuʼulsaʼal le Luʼumaʼ?

▪ Yaan máakoʼobeʼ tu tukloʼob yaan u xuʼulsaʼal le Luʼum 21 tiʼ octubre tiʼ 2011. Baʼaleʼ maʼ bey úuchikiʼ. Harold Camping, locutor tiʼ radio tu luʼumil Estados Unidoseʼ, pʼáat kʼaasil. Le máakaʼ tu yaʼaleʼ u kʼiinil le juiciooʼ 21 tiʼ mayo tiʼ 2011 ken taalak. Teʼ kʼiin binoʼ jach yaan u tíitkuba Luʼum, yéetel cinco meses tsʼoʼokkeʼ ku xuʼulsaʼal bin tu kʼiinil 21 tiʼ octubre.

U jaajileʼ le Luʼumaʼ mix bikʼin kun xuʼulul, tumen le Máax beetmiloʼ maʼ ken u chaʼe. Le Bibliaoʼ ku yaʼalik: «Teech ta utsil jetsʼkúuntaj le luʼumaʼ[,] bey xan pʼáatikoʼ» (Salmo 119:90).

Baʼaleʼ yaan máaxoʼob xokik le Bibliaoʼ maʼ bey u tuklikoʼobiʼ; ku yaʼalikoʼobeʼ tóokbil kun beetbil le Luʼumaʼ. Letiʼobeʼ ku chʼaʼchiʼitkoʼob 2 Pedro 3:7, 10, tuʼux ku yaʼalik: «Le kaʼanoʼob yéetel le luʼum yanoʼob bejlaʼeʼ, kanáantaʼanoʼob utiaʼal le kʼáakʼoʼ, tu yoʼolal u tʼaan Jajal Dios xan. Le kʼáakʼoʼ bíin u tóokoʼob tu kʼiinil le pʼis óoloʼ, le ken xuʼulsaʼakoʼob le máaxoʼob kʼasaʼanoʼoboʼ. [...] Baʼaleʼ u kʼiinil Yuumtsileʼ bíin taalak tiʼ le kʼiin maʼ táan u páaʼtaʼaloʼ, jeʼel bix u taal juntúul j-ookol yéetel áakʼabeʼ. Le kaʼanoʼob túunoʼ bíin xuʼulsaʼakoʼob yéetel junpʼéel jakʼbeʼen juum, tuláakal baʼax beetaʼanileʼ bíin xuʼulsaʼak yéetel kʼáakʼ, bey xan le luʼumoʼ bíin tóokaʼak paʼteʼ yéetel tuláakal baʼax yaniʼ». Le baʼax tu yaʼalaj apóstol Pedroaʼ, ¿u kʼáat wa túun u yaʼal jach letiʼe kaʼan yéetel le Luʼum k-ilik kun xuʼulsbiloʼobaʼ?

Maʼ. ¿Baʼaxten? Tumen le bix u naʼataʼal le tekstoaʼ kʼaʼabéet maʼ u contradecirtik le uláakʼ baʼaxoʼob tu tsʼíibtaj apóstol Pedrooʼ mix le uláakʼ libroʼob yaan teʼ Bibliaoʼ. Wa jach letiʼe Luʼum kun tóokbil jeʼex u tuklaʼaloʼ, ¿u kʼáat wa túun u yaʼal yaan u tóokaʼal le kaʼanoʼob —tuʼux yaan u millonesil estrellaʼob yéetel uláakʼ nukuch baʼaloʼob— chéen tu culpa junmúuchʼ máakoʼob kʼasaʼanoʼob? Koʼox ketik beyaʼ, techeʼ ¿jeʼel wa a kʼaskúuntik wa a xuʼulsik junpʼéel jáal jaʼ chéen tumen maʼ jatsʼuts a wilik jujunpʼéel u chan arenailoʼobiʼ? ¿Máasaʼ maʼatan? Jéeoba xaneʼ maʼ ken u xuʼuls tuláakal le bukaʼaj baʼaxoʼob u beetmaj chéen tu yoʼolal le jujuntúul máakoʼob líikʼoʼob tu contra way Luʼumeʼ.

Tsʼoʼoleʼ maʼ letiʼe baʼax tu kaʼansaj Jesusoʼ. Letiʼeʼ tu yaʼalaj: «Kiʼ u yóoloʼob le máaxoʼob kabal u yóol u puksiʼikʼaloʼoboʼ, tumen bíin u tiaʼaltoʼob le luʼumaʼ» (Mateo 5:5; Salmo 37:29). Juntúul taatatsileʼ, ¿jeʼel wa u beetik junpʼéel naj utiaʼal u familia chéen utiaʼal ka u paʼa le ken tsʼoʼokkeʼ? (Salmo 115:16). Lelaʼ míin mix máak jeʼel u beetkeʼ. Tsʼoʼoleʼ Jéeobaeʼ jach u yaabiltmaj u paalal (Salmo 103:13; 1 Juan 4:8).

Tiʼ 2 Pedro 3:7, 10, apóstol Pedroeʼ tu yaʼalaj luʼum utiaʼal u tʼaan tiʼ le kʼasaʼan máakoʼoboʼ. Jeʼex a wilkoʼ, Pedroeʼ tu ketaj u kʼiinil le juicio yéetel le Búulkabaloʼ (2 Pedro 3:5, 6). Teʼ kʼiinoʼ chéen le kʼasaʼanoʼob kíimoʼoboʼ. Le Luʼum, Noé yéetel u familiaeʼ maʼ xuʼulsaʼaboʼobiʼ. Le ka tu yaʼalaj xan Pedro le tʼaan kaʼanoʼoboʼ, táan u tʼaan tiʼ u gobiernoiloʼob wíinik (Daniel 2:44). Bey túunoʼ le máaxoʼob kʼasaʼanoʼob maʼ taak u yutskíintik u kuxtaloʼoboʼ yaan u xuʼulsaʼaloʼob; le kʼasaʼan gobiernoʼob tsʼaʼan tumen wíinikoʼ yaan u jeelintaʼaloʼob tumen u Reino wa u gobierno Dios yaan teʼ kaʼanoʼ (Daniel 2:44).

Jeʼex tsʼoʼok k-kanikoʼ, ¿yaan u xuʼulsaʼal túun le Luʼumaʼ? Maʼ. Le baʼax kun xuʼulsbiloʼ letiʼe máakoʼob kʼasaʼanoʼoboʼ. Le Luʼum yéetel le máaxoʼob ku yuʼubikoʼob u tʼaan Diosoʼ mix bikʼin kun xuʼulsbiloʼob (Proverbios 2:21, 22).