Bixuiʼlú yegánnaluʼ ti guidxi primé biaje. Bidiiluʼ cuenta gadxé ca binni que, gadxé costumbre nápacaʼ, guendaró ne bueltu sticaʼ. Zándaca qué zadxélaluʼ xi gúniluʼ.

Zacaca nga zanda guizaacaluʼ primé biaje gúʼndaluʼ Biblia. Zuxuíʼluluʼ casi ñaca nuuluʼ sti ladu, ti lugar ni qué runibiaʼluʼ. Zunibiaʼluʼ stale guidxi, casi ca filisteu ne laaca zaziidiluʼ caadxi costumbre nacubi, casi guicheza binni xhaba. Ne laaca zuundaluʼ de ti guendaró ni láʼ maná (Éxodo 16:31; Josué 13:2; 2 Samuel 3:31). Zándaca qué ziéneluʼ guiráʼ ndiʼ. Guníʼ ique guidxi ra nuuluʼ que, ñécheluʼ stale ñacané tuuxa lii. Cadi ñuuláʼdxiluʼ nusiene tuuxa lii ca cosa qué riéneluʼ de Biblia la?

Dede dxi bizulú gucuá Biblia, lu siglu dieciséis ante de ca dxi stiʼ Jesús, qué huayaadxaʼ ni gacané binni para guiene ni. Casi Moisés, primé hombre guca xaíque stiʼ guidxi Israel, bisiénebe ca ley ni nápacabe dxiqué (Deuteronomio 1:5).

Biaʼ chii siglu despué, guyuuruʼ maestru ni bisiidiʼ binni de Biblia. Lu iza 455 ante de ca dxi stiʼ Jesús, bidxiña stale binni ti lugar ra ridagulisaa ca binni de Jerusalén, dede né xcuidi. Cani rusiidiʼ de Biblia biindacaʼ «ra cá Ley stiʼ Dios ni dxandíʼ, bisiénecabe ni ne guníʼcabe xi riniʼni; zacá gucanécabe binni guiene ni cayuundacabe que» (Nehemías 8:1-8).

Biaʼ gaayuʼ gayuaa iza despué, biʼniʼ Jesús ti dxiiñaʼ zaqueca ra bisiidiʼ binni. Ne binibiáʼ binni laabe casi ti maestru (Juan 13:13). Nuu ra bisiidibe ti binni si ne nuu ra bisiidibe stale. Ti biaje bisiidibe ti grupu de binni ne bidiibe ti libana lu ti dani ne nabé runibiáʼ binni ni yanna. «Nabé bidxagayaa ca binni que modo bisiidi be.» (Mateo 5:1, 2; 7:28.) Lu iza 33 byuiʼné Jesús chupa discípulo stiʼ diidxaʼ laga zecaʼ ti guidxihuiiniʼ nuu gaxha de Jerusalén. Bisiénebe laacaʼ «xi na Xquiʼchi Dios» (Lucas 24:13-15, 27, 32).

Laaca gunna ca discípulo stiʼ Jesús gusiidicaʼ Stiidxaʼ Dios. Ti biaje cayuundaʼ ti hombre de Etiopía runi xhiiñaʼ ti reina ti relatu zeeda lu Stiidxaʼ Dios. Bidxiña discípulo Felipe ra nuube ne gunabadiidxaʼ laabe: «Rieʼnu gouʼ ni cayuunda lu ca». Óraque na: «Ximodo ndi guieneʼ pa iruti tu usiene naa». Para bisiene Felipe laabe xiná relatu que (Hechos 8:27-35).

Cásica guyuu maestru ni bisiidiʼ ni na Stiidxaʼ Dios dxiqué, zacaca cayuni ca testigu stiʼ Jiobá yanna lu 239 guidxi roʼ ne territorio (Mateo 28:19, 20). Guiráʼ semana racanécabe jma de gaʼ millón binni guiene ni rusiidiʼ Biblia. Stale de ca binni riʼ cadi zinándacaʼ Cristu. Qué riguixe binni para guiziidiʼ, zanda gusiidicabe lii ra lídxiluʼ o ra tiica naluʼ, laaca zanda gácani pur teléfono o pur videoconferencia.

Pa racaláʼdxiluʼ guiziidiluʼ la? guniʼné ti testigu stiʼ Jiobá. Zudiiluʼ cuenta cadi nagana diʼ nga guiene binni Biblia, sínuque «nuu ni para usiidi ni laanu ne para ulidxe ni laanu ne para gabi ni laanu paraa cuchéʼ nu ne para acané ni laanu ibani nu casi na Dios, ti iziidi chaahui ca xpinni Dios para ganda guni irá ni riree ndu» (2 Timoteo 3:16, 17).