Izingelosi ziyizidalwa ezinamandla kakhulu nezikwazi ukwenza izinto ezinkulu ukwedlula abantu. (2 Petru 2:​11) Zihlala ezulwini, okuyindawo esezingeni eliphakeme kunelomhlaba nomkhathi esiwubonayo. (1 AmaKhosi 8:​27; Johane 6:​38) Zibizwa nangokuthi umoya.​—1 AmaKhosi 22:21; IHubo 18:10.

Zivelaphi izingelosi?

UNkulunkulu wasebenzisa uJesu, iBhayibheli elimbiza ngokuthi “izibulo layo yonke indalo,” ukuze adale izingelosi. Lapho iBhayibheli lichaza indlela uNkulunkulu asebenzisa ngayo uJesu ekudaleni zonke izinto, kuhlanganise nezingelosi lithi: “Kwadalwa [ngoJesu] zonke ezinye izinto emazulwini nasemhlabeni, izinto ezibonakalayo nezinto ezingabonakali.” (Kolose 1:​13-​17) Izingelosi azishadi futhi azibi nezingane. (Marku 12:25) Kunalokho, ngayinye ‘yala madodana kaNkulunkulu weqiniso’ yadalwa.​—Jobe 1:6.

Izingelosi zadalwa kudala, ngaphambi kokuba kube khona umhlaba. Lapho uNkulunkulu edala umhlaba, izingelosi ‘zaqala ukumemeza zihalalisa.’​—Jobe 38:​4-7.

Zingaki izingelosi ezikhona?

IBhayibheli alisinikezi inani eliqondile lezingelosi, kodwa liyabonisa ukuthi ziningi kakhulu. Ngokwesibonelo, umbono owabonwa umphostoli uJohane wawuhlanganisa namakhulu ezigidi ezingelosi.​—IsAmbulo 5:​11.

Ingabe ingelosi ngayinye inegama nobuntu obuhlukile?

Yebo. IBhayibheli lisinikeza amagama ezingelosi ezimbili: uMikayeli noGabriyeli. (Daniyeli 12:1; Luka 1:​26) a Nezinye izingelosi zavuma ukuthi zinawo amagama, kodwa azizange ziwasho.​—Genesise 32:29; AbAhluleli 13:17, 18.

Izingelosi zinobuntu obungafani. Ziyakwazi ukukhuluma zizodwa. (1 Korinte 13:1) Ziyakwazi ukucabanga futhi ziqambe namazwi okudumisa uNkulunkulu. (Luka 2:​13, 14) Zinalo nelungelo lokukhetha phakathi kokulungile nokungalungile, njengoba sibona endleleni ezinye ezakhetha ngayo uhlangothi lukaSathane uDeveli ekuvukeleni igunya likaNkulunkulu.​—Mathewu 25:41; 2 Petru 2:4.

Ingabe kunezigaba ezingafani zezingelosi?

Yebo. Ingelosi enamandla nenegunya elikhulu uMikayeli, ingelosi eyinhloko. (Jude 9; IsAmbulo 12:7) Amaserafi izingelosi ezisesigabeni esiphakeme ezima eduze kwesihlalo sobukhosi sikaJehova. (Isaya 6:​2, 6) Amakherubi akha esinye isigaba esiphakeme sezingelosi ezinemsebenzi ekhethekile. Ngokwesibonelo, amakherubi aqapha indlela eya ensimini yase-Edene ngemva kokuba u-Adamu no-Eva bexoshiwe kuyo.​—Genesise 3:​23, 24.

Ingabe izingelosi ziyabasiza abantu?

Yebo, uNkulunkulu usebenzisa izingelosi zakhe ezithembekile ukuze zisize abantu namuhla.

• UNkulunkulu usebenzisa izingelosi ukuze aqondise izinceku zakhe ekushumayeleni izindaba ezinhle zoMbuso wakhe. (IsAmbulo 14:​6, 7) Indlela aqondisa ngayo lo msebenzi izuzisa labo abashumayelayo kuhlanganise nalabo abezwa izindaba ezinhle.​—IzEnzo 8:​26, 27.

• Izingelosi zisiza ekugcineni ibandla lobuKristu lihlanzekile, lingangcoliswa abantu ababi.​—Mathewu 13:49.

• Izingelosi ziqondisa futhi zivikele labo abathembekile kuNkulunkulu.​—IHubo 34:7; 91:10, 11; Hebheru 1:​7, 14.

• Maduzane, izingelosi zizoletha impumuzo esintwini ngokulwa zinoJesu Kristu lapho esusa ububi emhlabeni.​—2 Thesalonika 1:​6-8.

Ingabe ngamunye wethu unengelosi yakhe emqaphile?

Nakuba izingelosi zisiza izinceku zikaNkulunkulu ukuba zibe nobuhlobo obuhle naye, lokhu akusho ukuthi uNkulunkulu unika umKristu ngamunye ingelosi emqaphayo. b (Mathewu 18:10) Izingelosi azizivikeli izinceku zikaNkulunkulu kuzo zonke izilingo noma uvivinyo. IBhayibheli libonisa ukuthi ezikhathini eziningi uNkulunkulu ‘uyokwenza indlela yokuphuma’ ovivinyweni ngokunika umuntu ukuhlakanipha namandla okulukhuthazelela.​—1 Korinte 10:12, 13; Jakobe 1:​2-5.

Imibono eyiphutha ngezingelosi

Umbono oyiphutha: Singathandaza sicele usizo ezingelosini.

Iqiniso: Umthandazo uyingxenye yokukhonza uJehova uNkulunkulu, okunguye kuphela okufanele simkhonze. (IsAmbulo 19:10) Kufanele sithandaze kuNkulunkulu kuphela, egameni likaJesu.​—Johane 14:6.