Yawn hkyen hkrum ai shaloi, masha langai gaw “hpa majaw kun?” ngu nna san chye ai. Dai ga san a mahtai hpe Chyum Laika hta asan sha tsun da ai hpe chye lu ai gaw grai kabu hpa re.

1. Satan gaw mungkan ga hta n kaja ai lam ni byin hkra gara hku galaw wa ai kun?

Nat Satan gaw Karai Kasang hpe gumlau wa ai. Satan gaw kaga ni hpe uphkang mayu ai. Dai majaw, shi a gumlau ai lam hta shang lawm na matu, Adam yan Ewa hpe shingkang ka-up wa ai. Satan gaw Ewa hpe masu ga tsun ai hku nna gumlau wa ai. (Ningpawt 3:​1-5) Yehowa gaw kaja ai lam lama ma n jaw ai sha ngam da ai ngu, Ewa myit wa hkra Satan galaw wa ai. Shinggyim masha ni gaw, Karai Kasang a ga hpe n madat yang, grau pyaw na re ngu lachyum nga ai ga hpe Satan tsun wa ai. Satan gaw, Ewa hpe nang si na n re ngu tsun ai hku nna shawng nnan masu wa ai. Dai majaw, Chyum Laika hta Satan hpe “masu ai wa rai nga ai hte, masu magaw ai a kawa mung, rai nga ai” ngu tsun da ai.​—Yawhan 8:44.

2. Adam yan Ewa hpa galaw na matu lata wa ai kun?

Yehowa gaw Adam yan Ewa hpe nhpaw n-ya jaw wa ai. Edin sun hta nga ai hpun langai hta lai nna, kaga hpun yawng hpe mai sha ai ngu shan hpe Karai Kasang tsun wa ai. (Ningpawt 2:​15-17) Raitim, shan gaw hkum pat da ai hpun kaw na namsi hpe sha na matu dawdan wa ai. Ewa gaw ‘dai hpun hta na asi di sha kau ai.’ Dai hpang, Adam ‘mung sha kau ai.’ (Ningpawt 3:6) Shan Karai Kasang a ga n madat wa ai. Adam yan Ewa gaw hkum tsup ai majaw, jaw ai hpe galaw na matu shan yan chye ngut chyalu re. Raitim, shan gaw Karai Kasang a ga hpe dingsang n madat ai hku nna mara galaw wa ai. Karai Kasang uphkang ai hpe nyet kau ai. Dai dawdan lam gaw, shan hpe grai hkra machyi ai lam ni byin wa shangun ai.​—Ningpawt 3:​16-19.

3. Adam yan Ewa a dawdan lam gaw anhte hpe gara hku hkra machyi shangun ai kun?

Adam yan Ewa mara galaw ai majaw n hkum tsup mat ai. Shan kaw na yu hkrat wa ai kashu kasha yawng mung, n hkum tsup mat ai. Adam hte seng nna Chyum Laika hta ndai hku tsun da ai: “Masha langai mi a jaw e yubak gaw mungkan ga e shang wa nna, yubak a majaw si hkrung si htan shang nang wa ai hte maren, yawng mayawng yubak kap nga ma ai.”​—Roma 5:12.

Lam amyu myu a majaw anhte ni yakhkak jamjau hkrum ai. Kalang lang, anhte dawdan shut ai majaw, kaga masha ni a n kaja ai dawdan lam a majaw, n du ging ai aten hte shara hta du nga ai majaw, yakhkak jamjau hkrum chye ai.​—Hpaji 9:11 hpe hti u.

 Kahtap Hkaja

4. Yakhkak jamjau ai lam ni a matu lit nga ai wa

Mungkan ting hpe Karai Kasang uphkang nga ai ngu masha law law kam ma ai. Dai gaw jaw ai kun? VIDEO hpe hpaw.

Yaku 1:13 hte 1 Yawhan 5:19 hpe hti nna, ndai ga san hpe bawngban u:

• Yakhkak jamjau ai lam hte nhkru n kaja ai lam ni a matu Karai Kasang hta lit nga ai kun?

5. Satan uphkang ai majaw byin nga ai lam ni hpe hkaja yu u

1. Adam yan Ewa gaw, hkum tsup ai asak hte Hparadisu hta asak hkrung wa ai. Raitim, shan gaw Satan a ga hpe madat nna Yehowa hpe gumlau wa

2.   Gumlau ngut ai hpang, mungkan hta yubak mara ni, si hkrung si htan ni hte yakhkak ai lam ni hpring mat

3. Yubak mara, yakhkak jamjau ai lam hte si hkrung si htan ni hpe Yehowa yeng seng kau ya na. Shinggyim masha ni gaw, hkum tsup ai prat hte Hparadisu hta kalang bai asak hkrung lu na

6. Anhte a yakhkak jamjau ai lam hpe Yehowa chye

Anhte yakhkak jamjau hkrum ai shaloi, Karai Kasang lanu lahku ya ai kun? Hkawhkam Dawi hte kasa Petru ka wa ai lam hpe hkaja yu u. Shakawn 31:7 hte 1 Petru 5:7 hpe hti nna, ndai ga san hpe bawngban u:

• Yehowa gaw, anhte yakhkak hkrum ai hpe chye nna lanu lahku ya ai hpe chye ai majaw, nang gara hku hkamsha ai kun?

 Kadun Dawk

Satan hte Adam yan Ewa gaw, mungkan hta byin nga ai nhkru ai lam ni a matu lit nga ai ni re. Yehowa gaw, anhte yakhkak hkrum nga ai hpe atsawm chye ya nna, kade n na yang, yeng seng kau ya na re.

Bai Maram

• Satan gaw Ewa hpe hpa masu ga tsun wa ai kun?

• Adam yan Ewa a gumlau ai lam gaw anhte yawng hpe gara hku hkra machyi shangun ai kun?

• Yakhkak hkrum nga ai lam ni hte seng nna Yehowa lanu lahku ya nga ai hpe anhte gara hku chye lu ai kun?