DAW 50
Dinghku Gara Hku Ngwi Pyaw Lu Na Kun?—Daw 2
Ma ni gaw Yehowa jaw ai kumhpa re. Dai kumhpa hpe kanu kawa ni atsawm lanu lahku na matu, shi hpyi shawn da ai. Dai hku galaw lu hkra, kanu kawa ni hpe karum ya lu ai hpaji jaw ga ni hpe Yehowa lajang da ya ai. Dinghku ngwi pyaw hkra, ma ni gara hku galaw lu na lam hpe mung tsun dan da ai.
1. Kanu kawa ni a matu, Yehowa gara hpaji jaw ga jaw da ai kun?
Kanu kawa ni gaw ma ni hpe tsawra nna, byin mai ai daram aten jaw na matu Yehowa hpyi shawn da ai. Shoihpa n hkrum hkra ma ni hpe makawp maga ya na matu, sharin achyin ai shaloi Chyum Laika npawt tara ni hpe akyu jashawn na matu, shi myit mada ai. (Ga Shagawp 1:8) Yehowa a “daru shadum ai lam hta, [nanhte a kasha ni] hpe bau maka nga mu” ngu kawa ni hpe tsun da ai. (Ehpesu 6:4 hpe hti u.) Yehowa a lam matsun hte maren ma ni hpe bau maka nna, dai lit hpe kaga ni hpe n ap ai nga yang, shi myit pyaw ai.
2. Ma ni a matu, Yehowa gara hpaji jaw ga jaw da ai kun?
Yehowa gaw ma ni hpe ndai hku lam matsun jaw da ai: “Kanu kawa ni hpe . . . madat mara nga mu.” (Kolose 3:20 hpe hti u.) Ma ni gaw kanu kawa ni hpe hkungga nna madat mara ai nga yang, Yehowa mung, kanu kawa ni mung myit pyaw ai. (Ga Shagawp 23:22-25) Yesu gaw, ma prat hta kaja ai kasi ningli madun wa ai. Shi gaw hkum tsup ai wa raitim, kanu kawa a ga madat nna hkungga ai.—Luka 2:51, 52.
3. Dinghku nawng Karai Kasang hte gara hku nihtep lu na kun?
Nang gaw kanu kawa rai yang, Yehowa hpe nang tsawra ai zawn, ma ni hpe mung tsawra shangun mayu na re. Dai hpe gara hku galaw lu na kun? “Na nsha ni hpe myit hta matsing mat hkra sharin achyin ya u; nta e dung nga let mung, lam e hkawm sa let mung, . . . [Yehowa a] ga tsun nga u” ngu ai lam matsun hpe hkan sa ai hku nna galaw lu ai. (Tara Jahprang 6:7, NWT) “Matsing mat” na matu, kahtap htap sharin ya ra ai. Lama ma hpe kahtap htap tsun na nga yang, dai lam hpe ma ni matsing mat na hpe nang chye ai. Yehowa a lam ma ni hpe tsun dan na matu ayan na ahkaw ahkang tam ging ai ngu, dai Chyum daw gaw tsun mayu ai re. Dinghku nawng bat shagu nawku lamang galaw na matu, aten masat da ai gaw kaja ai. Nang hta ma n nga yang mung, Karai a Mungga hpe hkaja na matu bat shagu aten jaw na nga yang akyu lu na re.
Kahtap Hkaja
Dinghku ngwi pyaw nna shim lum hkra karum ya lu ai, tatut re ai hpaji jaw ga ni hpe hkaja yu ga.
4. Ma ni hpe tsawra myit hte shaman ya u
Ma ni hpe shaman ya na matu yak chye ai. Chyum Laika gaw gara hku karum ya lu ai kun? Yaku 1:19, 20 hpe hti nna, ndai ga san ni hpe bawngban u:
-
Kanu kawa ni gaw, ma ni hpe tsun shaga ai shaloi tsawra myit gara hku madun lu na kun?
-
Masin pawt nga ai shaloi, hpa majaw n sharin shaga ging ai kun? a
5. Ma ni hpe makawp maga ya u
Ma ni hpe makawp maga ya na matu, ngang hte seng nna ma langai hpra hpe tsun dan na matu ahkyak ai. Dai hku tsun dan na matu yak chye ai. VIDEO hpe hpaw, dai hpang ndai ga san ni hpe bawngban u.
-
Ngang hte seng nna ma ni hpe tsun dan na matu, kanu kawa nkau hpa majaw yak ai kun?
-
Kanu kawa nkau gaw, ngang hte seng nna ma ni hpe gara hku sanglang dan wa ai kun?
Myihtoi htoi da ai hte maren, Satan a mungkan gaw lani hte lani grau grau sawng wa ai. 2 Timohti 3:1, 13 hpe hti nna, ndai ga san hpe bawngban u:
-
Daw kaji 13 hta tsun da ai nhkru ai masha nkau mi gaw, ma ni hpe roi rip ma ai. Dai majaw kanu kawa ni gaw, ma ni hpe ngang hte seng nna sharin ya na matu, roi rip n hkrum hkra gara hku makawp maga na hte seng nna sharin ya na matu hpa majaw grai ahkyak ai kun?
Nang chye ai kun?
Ngang hte seng nna ma ni hpe sharin ya na matu, roi rip ai lam kaw na makawp maga ya na matu karum ya lu ai hkingrai ni hpe kanu kawa ni a matu Yehowa Sakse ni lajang da ya ai. Ga shadawn:
-
Na A Ma Ni Hpe Makawp Maga U (video)
-
“Ngang Hte Seng Nna Ma Ni Hpe Sharin Ya U” (Dum Hprang! No. 5 2016)
6. Kanu kawa ni hpe hkungga u
Ma ni hte ramma ni gaw, tsun shaga ai lam hku nna kanu kawa ni hpe hkungga ai lam madun mai ai. VIDEO hpe hpaw nna, ndai ga san ni hpe bawngban u.
-
Ramma langai gaw kanu kawa ni hpe hkungga ai hku tsun shaga ai gaw hpa majaw akyu nga ai kun?
-
Ramma langai gaw kanu kawa ni hpe hkungga ai lam madun ai hku nna gara hku tsun shaga mai ai kun?
Ga Shagawp 1:8 hpe hti nna, ndai ga san hpe bawngban u:
-
Kanu kawa ni, lam matsun jaw ai shaloi, ramma langai gara hku bai htang ging ai kun?
7. Dinghku nawng Yehowa hpe nawku u
Yehowa Sakse dinghku ni gaw, bat shagu rau nawku na matu aten masat da ai. Dinghku nawku hpe gara hku galaw ai kun? VIDEO hpe hpaw, ndai ga san ni hpe bawngban u.
-
Dinghku nawku lamang hpe ayan gara hku galaw lu na kun?
-
Dinghku nawku hpe tatut rai nna ngwi pyaw hkra, kanu kawa ni gara hku galaw lu na kun? Ndai daw nnan hpang ai shaloi hta lawm ai sumla hpe yu u.
-
Rau hkaja na matu hpa lam gaw nang hpe yak shangun ai kun?
Moi Israela prat hta, Chyum Laika a lam rau tsun shaga na matu dinghku ni hpe Yehowa hpyi shawn da ai. Tara Jahprang 6:6, 7 hpe hti nna, ndai ga san hpe bawngban u:
-
Ndai npawt tara hpe gara hku hkan sa lu na kun?
Dinghku nawku hta galaw mai ai lam ni:
-
Nawku zuphpawng a matu hkyen lajang u.
-
Dinghku nawng ra sharawng ai Chyum Laika labau langai hpe hti nna bawngban u.
-
Ma kaji ni nga ai nga yang, jw.org/kac kaw na “Tatut Galaw Mai Ai Lam Ni” hta lawm ai lam ni hpe akyu jashawn u.
-
Ramma ni nga ai nga yang, jw.org/kac kaw na “Ramma Ni A Ga San” hta lawm ai daw matut sumhpa ni hpe bawngban u.
-
Chyum Laika maumwi ni hpe ma ni hte rau hkrang shala u.
-
jw.org/kac hta lawm ai video ni hpe yu u.
Nkau Mi Tsun Ai: “Chyum Laika hpe ma ni chye na na matu yak ai.”
-
Nang gara hku tsun na?
Kadun Dawk
Ma ni hpe tsawra na matu, shaman ya na matu, makawp maga ya na matu kanu kawa ni hpe Yehowa hpyi shawn da ai. Ma ni mung kanu kawa hpe hkungga nna madat mara na matu hte dinghku nawng shi hpe nawku dawjau na matu hpyi shawn da ai.
Bai Maram
-
Kanu kawa ni gaw ma ni hpe gara hku shaman ya nna makawp maga ya lu ai kun?
-
Ma ni gaw kanu kawa ni hpe hkungga ai lam gara hku madun mai na kun?
-
Dinghku nawng, bat shagu nawku na matu aten masat da yang hpa akyu ni lu na kun?
Sawk Sagawn
Ma ni kunghpan wa hkra gara hku hkyen lajang ya mai ai kun?
Asak kaba ai kanu kawa ni hpe lanu lahku ya nga ai ni a matu, Chyum Laika hta lawm ai hpaji jaw ga ni hpe hti yu u.
Ma ni hpe nau n chye lanu lahku ai kawa langai gaw, gara hku nna kaja ai kawa langai byin wa ai hpe yu yu u.
Kawa ni gaw kasha lasha ni hte hku hkau hkra, gara hku galaw mai ai hpe hti yu u.
a Chyum Laika hta, sharin shaga ai ngu tsun ai shaloi, lam matsun ya ai, sharin achyin ya ai, shading sharai ya ai hpe tsun ai re. Zingri ai, laja lana dam jaw ai lam ni n lawm ai.—Ga Shagawp 4:1.
You May Also Like
SAN CHYE AI GA SAN NI
Yehowa Sakse Ni Saw Shaga Ai Chyum Laika Hkaja Lamang Ngu Ai Gaw Hpa Rai Kun?
Manu jahpu n jaw ra ai Chyum Laika hkaja ai lamang hpe Yehowa Sakse ni saw shaga ai shaloi, gara Chyum Laika hpe raitim, nang mai lang ai. Na nta masha ni, manang ni, kadai hpe raitim, saw shaga mai ai.
