“Hamoonni akka aramaatti kan biqilan, warri balleessaa raawwatanis kan lalisan taʼus, bara baraaf ni balleeffamu.”—FAARFANNAA 92:7.

Akkuma mata duree darbe irratti ilaalle hamminni yeroodhaa gara yerootti dabalaa jira. Garuu kun nu dinqisiisuu hin qabu. Sababiin isaas, kun akka taʼu Kitaaba Qulqulluu keessatti dursee dubbatameera; 2 Ximotewos 3:1-5 “guyyoota dhumaatti” namoonni caalaatti hamoo akka taʼan dubbata. Guyyoota dhumaa jechuun maal jechuu dha? Guyyoota dhumaa namoota Waaqayyoof hin ajajamnee jechuu dha. Dhiheenyatti, Waaqayyo namoota amala isaanii isa gadhee jijjiiruu hin barbaanne ni balleessa. Achiis namoota gaarii, jechuunis namoota Waaqayyoof ajajaman qofatu hafa. “Qajeelonni lafa ni dhaalu, bara baraafis ishii irra ni jiraatu.”—Faarfannaa 37:29.

“Waaqayyo inni nagaa kennu ofii isaatii dhiheenyatti Seexana . . . ni buruqsa.”—ROOMAA 16:20.

 Seexanaa fi jinniiwwan isaa dabalatee namoonni hamoon hundi yeroo balleeffamanitti lafti nagaa argatti. Uumaan keenya waadaa, “Eenyu iyyuu [isin] hin sodaachisu” jedhu nuuf galeera.—Miikiyaas 4:4.

“Dunkaanni Waaqayyoo namootaa wajjin jira . . . Inni imimmaan hundumaa ija isaanii irraa ni haqa; duutis kana booda hin jiraatu; gaddis taʼe iyyi yookiin dhiphinni kana booda hin jiraatu.”—MULʼATA 21:3, 4.

Waaqayyo waan hundumaa waan haaressuuf dhiphinaa fi dhukkuba sababa Seexanaatiin, sababa Addaamii fi Hewaaniin, akkasumas cubbuu dhaalleen kan kaʼe nutti dhufe ni balleessa. Kanaafuu, “duutis kana booda hin jiraatu.” Namoonni Uumaa isaanii jaallatanii fi isaaf ajajaman bara baraaf jiraatu. Garuu eessa jiraatu?

“Lafti onaanii fi lafti waxalamaan ni gammadu, gammoojjiin ni gammada, akkuma saafronittis ni daraara.”—ISAAYYAAS 35:1.

Waaqayyo yeroo hammina balleessutti lafti jannata taati! Iddoowwan biqiltuu babbareedoo fi nyaata gaʼaas ni qabaatti. (Faarfannaa 72:16) Garbawwan, haroowwanii fi lageen qulqulluu ni taʼu; lubbu qabeeyyii hedduunis isaan keessa ni jiraatu. Yeroo sanatti jecha “faalama” jedhu iyyuu hin dhageenyu! Namoonni mana ni ijaarratu, keessas ni jiraatu. Eenyu iyyuu mana keessa jiraatu hin dhabu, hin beelaʼu, akkasumas hin hiyyoomu.—Isaayyaas 65:21, 22.

‘Namoonni duʼaa ni kaafamu.’—HOJII ERGAMOOTAA 24:15.

Namoota jaallattuu fi duʼaan dhabde deebistee argachuu ni barbaaddaa? Waaqni inni Hundumaa Dandaʼu duʼaa isaan kaasuudhaan lafa Jannata taate irra isaan jiraachisa. Ati isaan ni yaadatta, isaanis si yaadatu. Mee atis taate warri duʼaa kaʼan hammam akka gammaddan yaadi! Abdiin kun akka raawwatamu mirkanaaʼoo kan taane maaliifi? Sababiin isaas, Kitaabni Qulqulluun namoonni guguddaanis taʼan ijoolleen duʼaa akka kaafamanii fi deebiʼanii maatii isaanii wajjin akka jiraatan ni dubbata. Kana malees, Yesuus yeroo baayʼee namoota duʼan duʼaa kan kaase bakka namoonni hedduun jiranitti dha.—Luqaas 8:49-56; Yohaannis 11:11-14, 38-44.