ROSO 33
Maganu Mangiste Assitannore
Maganu Mangiste xa iima gashshitanni no. Muli yannara baattote aanano lowore assitanno. Hanni Maganu Mangiste albillitte assitannohu danchu coyi giddo mito laˈno.
1. Maganu Mangiste uullate aana keerenna taashsho abbitannohu hiittoonniiti?
Maganu Mangiste Moote Yesuusi, busha mannanna mannu gashshoote Armagedooni olinni hunanno. (Yohaannisi Ajuuja 16:14, 16) Hatte yannara, “Bushuullu shiima yannalla keeshshitanno; dargaho laˈe hoogatto” yitannoti Qullaawu Maxaafi masaalo gudisante woˈmitanno. (Faarso 37:10) Yesuusi Mangistesi widoonni, uullate aana keerunna taashsho woˈmitanno gede assanno.—Isayaasi 11:4 nabbawi.
2. Maganu fajjo uullate aana woˈmitanno woyite heeshsho hiittoota ikkitanno?
Maganu Mangiste giddo, “keeraano baatto ragidhanno; ise aanano hegerera heedhanno.” (Faarso 37:29) Keeraanonna Yihowanna mimmito baxanno manni calla heeˈranno alamera heeˈneemmo heeshsho hiittoota ikkitannoro hanni hedi! Hatte yannara mittu manchino dixiwamanno; qoleno baalunku manni hegerera heeˈranno.
3. Bushu manni baihu gedensaanni Maganu Mangiste maa assitanno?
Bushuullu baˈuhu gedensaanni, Yesuusi moote ikke 1,000 diro gashshanno. Hattee yannara, isinna ledosi mookkannori 144,000 gashshaasine uullate aana noo manni guuta ikkanno gede kaaˈlitanno. Kumu Diri Gashshooti jeefora, baatto gudisante biifado gannate ikkitanno; qoleno mannu baalunku Yihowa seera agadhanno daafira hagiirraamo ikkanno. Hakkiinni Yesuusi gashshoote Annisira Yihowara qolanno. Hatte yannara, albinni roore Yihowa suˈmi qullaawa ikkanno. (Maatewoosi 6:9, 10) Yihowa soqqamaasinesi towaatannoha dancha Gashshaancho ikkinoti leeltanno. Hakkiinni Yihowa Sheexaane, durriissanna Gashshootisira finqiltannore baalanka hunanno. (Yohaannisi Ajuuja 20:7-10) Maganu Mangiste abbitannohu danchu coyi baalunku hegerera heeˈranno.
LEDDE XIINXALLI
Maganu Qullaawu Maxaafi giddo kulloonni hexxo baalanta Mangistesi widoonni wonshanno yine addaxxa dandiineemmohu mayiraatiro rosi.
4. Maganu Mangiste mannu gashshoote huntanno
Mannu manna “kade gashshanno.” (Rosiisaancho 8:9) Yihowa Mangistesi widoonni tenne taashshote xeˈne biddi assanno.
Daanieeli 2:44 nna 2 Teselonqe 1:6-8 nabbabbe; hakkiinni aante noo xaˈmuwa hasaabbe:
-
Yihowanna Beettisi Yesuusi mannu gashshootenna konne gashshoote doodhitinore hiissitanno?
-
Yihowanna Yesuusi daafira xaa geeshsha rosootto rosi, insa assitannori gara ikkinota ammanatto gede assannohehu hiittoonniiti?
5. Yesuusi baalanka rooranno Mooteeti
Yesuusi Maganu Mangiste Moote ikkino daafira, uullate aana heeˈranno manna kaaˈlate lowore assanno. Yesuusi manna kaaˈla hasiˈrannotanna tenne assateno Maganu wolqa uyinosita leellishino gara huwatate, VIIDIYO laˈe.
Yesuusi uullate aana noo yannara assinori, albillitte Maganu Mangiste maa assitannoro leellishannoho. Koye kulloonni atooti giddo ati laˈˈate roore quqquxamattohu hiikkoyeti? Mittu mittunku atooti ledo noo qummeeshshuwa nabbabbe.
|
YESUUSI UULLA NOO YANNARA . . . |
YESUUSI GORDOHO HEEˈRE . . . |
|---|---|
|
|
|
|
|
|
|
|
6. Maganu Mangiste dancha yanna abbitanno
Maganu Mangiste, Yihowa hunda mannu oosora hedinore wonshitanno. Mannu ooso uullate aana gannatete hegerera heedhanno. Yihowa hedinore Beettisi Yesuusi widoonni wonshanno gara huwatate, VIIDIYO laˈe.
Faarso 145:15, 16 nabbabbe; hakkiinni aante noo xaˈmo hasaabbe:
-
Albillitte Yihowa kalaqamu “woˈmunku halcho” wonshannota hedatto woyite mayyaatto?
MITU MANNI TOGO YAANNO: “Baalunku kaaˈlamme loonsummoro, alamete qarra tira dandiineemmo.”
-
Mannu gashshooti tira dandaannokkihu Maganu Mangiste tirtanno qarri hiikkoyeti?
XAPHISHSHA
Maganu Mangiste isi hedinore wonshitanno. Uulla gudisante gannate ikkitanno gede assitanno; hakkawoyite uullate aana Yihowa magansiˈranni hegerera heeˈrannohu danchu manni woˈmanno.
Kageeshsha Rosoottore
-
Maganu Mangiste Yihowa suˈmi qullaawa ikkanno gede assitannohu hiittoonniiti?
-
Maganu Mangiste Qullaawu Maxaafi giddo kulloonni hexxo wonshitannota addaxxineemmohu mayiraati?
-
Maganu Mangiste assitannohu danchu coyi giddo ati laˈˈate roore quqquxamattohu hiikkoyeti?
EGENNO LEXXI
Armagedooni maatiro nabbawi.
Yesuusihu 1,000 diri gashshooti yannaranna jeefora ikkannore wodanchi.
“Yoote Barra Mayi Ikkanno?” (Agarooshshu Shae, Wocawaaro 1, 2012)
Maate Maganu Gashshooti giddo afidhanno atoote hiinca dandiitanno gara lai.
“Alba Huluullitannoeti Lowo Xaˈmo Nooe” yitanno xagge giddo, mittu finqilu manchi xaˈmosira dawaro afiˈrino gara wodanchi.
“Qullaawu Maxaafi Heeshsho Biddi Assanno” (Agarooshshu Shae, Arfaasa 1, 2012)
Kurino Lai
DUUCHU MANNI XAˈMANNO XAˈMO
Yihowa Farciˈraasine Qullaawa Maxaafa Xiinxallissannohu Hiittoonniiti?
Yihowa Farciˈraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiˈra dandaatto. Xiinxallokkira maatekki gudisse woy jaallakki koyisa dandaatto.
