OKUFUNDISWA YIBHAYIBHILE
UMesiya
IBhayibhile yaxela kwangaphambili ukuba uMesiya wayeza kuza ehlabathini aze ahlangule abantu ekuguleni, ekubandezelekeni nasekufeni. Ngaba uYesu Kristu nguloo mntu?
Babeza kumqonda njani abantu uMesiya?
Ngokutsho kwesiprofeto seBhayibhile, uMesiya okanye uKristu, wayeza kufeza iindima ezimbini ezahlukeneyo, ezaziza kwahlulwa ngamaxesha amade. * Kwindima yakhe yokuqala wayeza kuba ngumntu. Ukuze aqondwe kakuhle, ababhali beBhayibhile baprofeta ngobomi nangobulungiseleli bakhe. Inyaniso kukuba, ‘ukungqinela uYesu’ yeyona njongo iphambili yesiprofeto seBhayibhile.—ISityhilelo 19:10.
Xa wayengumntu emhlabeni, uYesu wasikrobisa nje oko wayeza kukwenza kumhlaba wonke xa esisidalwa somoya esinamandla
OKUFUNDISWA YIBHAYIBHILE
UMesiya wayeza . . .
-
Kuba yinzala kaKumkani uDavide.—Isaya 9:7; Luka 3:23-31. *
-
Kuzalelwa kwidolophu yaseBhetelehem.—Mika 5:2; Luka 2:4-7.
-
Kuba ngumvakalisi othobekileyo ‘weendaba ezilungileyo.’—Isaya 61:1; Luka 4:43.
-
Kudelelwa aze abanjwe engenzanga nto.—Isaya 53:3; Mateyu 26:67, 68.
-
Kungcatshwa ngeengqekembe zesilivere eziyi-30.—Zekariya 11:12, 13; Mateyu 26:14, 15.
-
Kuthi cwaka phambi kwabo babemmangalela, njengokuba babeza kumgwebela ukufa ngaphandle kwesizathu.—Isaya 53:6, 7; Mateyu 27:12-14.
-
Kuba lidini ‘lemvana,’ eliphelisa isono lize lenze abantu bakwazi ukuma phambi kukaThixo becocekile.—Isaya 53:7; Yohane 1:29, 34, 36.
-
Kubulawa kodwa kungophulwa nokuba libe linye kumathambo akhe.—INdumiso 34:20; Yohane 19:33, 36.
-
Kungcwatywa nezityebi.—Isaya 53:9; Mateyu 27:57-60.
-
Kuvuswa ngosuku lwesithathu.—Mateyu 16:21; 28:5-7.
UYesu wazizalisekisa zonke ezi ziprofeto nezinye ezingakumbi. Waphilisa abagulayo waza wavusa nabafileyo. Akazange anele nje ukusinika ubungqina obungakumbi bokuba unguMesiya kodwa wasinika isizathu sokuba sibe nokholo kwisithembiso seBhayibhile sokuba ezi zinto uza kuzenza ehlabathini lonke kwixesha elizayo. (Luka 7:21-23; ISityhilelo 21:3, 4) Emva kokuvuswa kwakhe, uYesu wahlala ‘ngasekunene’ kukaThixo, elinde ixesha lokuba agqibe umsebenzi wakhe wokuba nguMesiya.—INdumiso 110:1-6.
“Xa uKristu efika, akayi kwenza miqondiso ingakumbi kunaleyo lo mntu ayenzileyo, akunjalo?”—Yohane 7:31.
UMesiya uza kuwufezekisa njani umsebenzi wakhe?
AmaYuda awayephila ngexesha likaYesu ayelindele ukuba uMesiya wayeya kuwakhulula kulawulo lwaseRoma, aze alawule kubukumkani bakwaSirayeli obubuyiselweyo. (IZenzo 1:6) Aqonda mva amaYuda awayengabalandeli bakaYesu ukuba wayeya kuwufeza esezulwini umsebenzi wakhe, sele esisidalwa somoya esinamandla nesinikwe igunya elikhulu.—Mateyu 28:18.
OKUTHETHWA YIBHAYIBHILE
Kumsebenzi wakhe wesibini uMesiya . . .
-
Uya kuba nguKumkani kuBukumkani bukaThixo, urhulumente wehlabathi lonke.—Daniyeli 7:13, 14; ISityhilelo 11:15.
-
Uya kuba yintsikelelo kubo bonke abantu ababonisa ukuba bayakholwa kuye.—Genesis 22:17, 18; INdumiso 72:7, 8.
-
Uya “kothusa iintlanga ezininzi” nabalawuli bazo xa ezitshayela ngenxa yokumchasa.—Isaya 52:15; ISityhilelo 19:19, 20.
-
Uya kuhlanganisela “isihlwele esikhulu” sabantu abangamalungisa kumhlaba omtsha onoxolo.—ISityhilelo 7:9, 10, 13-17.
-
Ekunye noYehova uThixo, uya kuvusela abafileyo kwiParadesi aph’ emhlabeni.—Luka 23:43; Yohane 5:21, 28, 29.
-
Uya kufundisa abalawulwa bakhe eyona ndlela yokuphila ngoxolo lokwenene.—Isaya 11:1, 2, 9, 10.
-
Aphelise isono kunye nokugula nokufa okubangelwa siso.—Yohane 1:29; Roma 5:12.
-
Aze ekugqibeleni acime yonke imisebenzi kaSathana aze amanyanise intsapho yoluntu phantsi kolawulo lukaYehova uThixo.—1 Korinte 15:25-28; 1 Yohane 3:8.
UYesu wawufeza umsebenzi wakhe wokuqala njengoMesiya. Useza kuwufeza nowesibini. Abalumkileyo ke bafundisisa ngaye, kuba uYesu wathi: “Ndim indlela nenyaniso nobomi.”—Yohane 14:6.
‘Ngomhla wakhe uya kuhluma olilungisa, nobuninzi boxolo ide ingabi sabakho inyanga. Uya kuba nabalawulwa ukusa eziphelweni zehlabathi.’—INdumiso 72:7, 8.
^ isiqe. 5 Igama elithi “Mesiya” livela kwisiHebhere. Ngoxa lona elithi “Kristu” lisisiGrike.—Yohane 1:41.
^ isiqe. 7 Isibhalo sokuqala apha sisiprofeto; esesibini, sibe yinzaliseko.
Mhlawumbi Ungayithanda Nale
IMIBUZO YEBHAYIBHILE IYAPHENDULWA
Ngaba Iziprofeto Ezithetha NgoMesiya Zibonisa Ukuba YayinguYesu UMesiya?
Ngaba ingenzeka into yokuba baninzi ooMesiya?
IMBONISELO
“Simfumene UMesiya”!
Abantu abaninzi bakholelwa ukuba uYesu nguMesiya othenjisiweyo. Abanye abakukholelwa oko. Khawuzihlolele oko kuthethwa yiBhayibhile.
