“O Jehova, kuyoze kube nini ngikhalela usizo, kodwa wena ungezwa? Kuyoze kube nini ngicela usizo kuwe ebudloveni, kodwa wena ungasindisi?” (Habakuki 1:2, 3) La mazwi ashiwo uHabakuki, indoda eyayilungile futhi ithandwa nguNkulunkulu. Ingabe la mazwi ayebonisa ukuthi wayengenalo ukholo? Cha! UNkulunkulu waqinisekisa uHabakuki ukuthi wayesesibekile isikhathi ayezoqeda ngaso ukuhlupheka.—Habakuki 2:2, 3.

Lapho wena noma umuntu omthandayo nibhekene nezinkinga, kulula ukuphetha ngokuthi uNkulunkulu uthatha isikhathi eside ukusiza. Kodwa iBhayibheli liyasiqinisekisa: “UJehova akephuzi ngokuqondene nesithembiso sakhe, njengoba abanye abantu becabanga ukuthi uyephuza, kodwa uyanibekezelela ngoba akafisi ukuba kubhubhe namunye kodwa ufisa ukuba bonke baphenduke.”—2 Petru 3:9.

Maduze! UJesu wathi abantu babeyobona izenzakalo ezingavamile ezaziyobonisa ukuthi sekuqala izinsuku zokugcina zalesi ‘simiso sezinto.’ (Mathewu 24:3-42) Ukugcwaliseka kwezinto uJesu athi zaziyokwenzeka kubonisa ukuthi sekuseduze ukuba uNkulunkulu alungise izinto. *

UNkulunkulu uzokuqeda kanjani ukuhlupheka? Ngesikhathi uJesu esemhlabeni, wabonisa ukuthi uNkulunkulu unamandla okuqeda ukuhlupheka. Nazi izibonelo zalokho akwenza.

Izinhlekelele Zemvelo: Ngesikhathi uJesu esolwandle nabafundi bakhe, kwaba nesiphepho esikhulu esacishe sacwilisa isikebhe sabo. Nokho, uJesu wabonisa ukuthi yena noYise banamandla okulawula imvelo. (Kolose 1:15, 16) Wavele wathi nje: “Shh! Thula!” Kwabe sekwenzekani? “Umoya wanqamuka, kwaba nokuzola okukhulu.”—Marku 4:35-39.

Izifo: Kwakwaziwa ukuthi uJesu uyakwazi ukwelapha izimpumputhe, abangakwazi ukuhamba, abanesifo sokuwa, abanochoko nabaphethwe ezinye izifo. “Welapha bonke ababengaphathekile kahle.”—Mathewu 4:23, 24; 8:16; 11:2-5.

Indlala: UJesu wasebenzisa amandla ayewanikwe uyise ukuze andise ukudla okuncane. IBhayibheli lithi wasuthisa izinkulungwane zabantu izikhathi ezimbili.—Mathewu 14:14-21; 15:32-38.

Ukufa: EBhayibhelini sifunda ngabantu abathathu abavuswa nguJesu, okuwubufakazi bokuthi uJehova unawo amandla okuvusa abantu asebefile. Omunye wabantu abavuswa wayesenezinsuku ezine efile.—Marku 5:35-42; Luka 7:11-16; Johane 11:3-44.