መዝሙር 104:1-35
104 ይሖዋን ላወድስ።*+
ይሖዋ አምላኬ ሆይ፣ አንተ እጅግ ታላቅ ነህ።+
ሞገስንና* ግርማን ለብሰሃል።+
2 ብርሃንን እንደ ልብስ ተጎናጽፈሃል፤+ሰማያትን እንደ ድንኳን መጋረጃ ዘርግተሃል።+
3 የላይኛዎቹን ክፍሎች ተሸካሚዎች ከላይ ባሉት ውኃዎች ላይ* ያኖራል፤+ደመናትን ሠረገላው ያደርጋል፤+በነፋስ ክንፎችም ይሄዳል።+
4 መላእክቱን መናፍስት፣አገልጋዮቹን የሚባላ እሳት ያደርጋል።+
5 ምድርን በመሠረቶቿ ላይ መሠረታት፤+እሷም ለዘላለም ከቦታዋ አትናወጥም።+
6 ጥልቅ ውኃን እንደ ልብስ አለበስካት።+
ውኃዎቹ ከተራሮቹ በላይ ቆሙ።
7 በገሠጽካቸው ጊዜ ሸሹ፤+የነጎድጓድህን ድምፅ ሲሰሙ በድንጋጤ ፈረጠጡ፤
8 ተራሮች ወደ ላይ ወጡ፤+ ሸለቆዎችም ወደ ታች ወረዱ፤ሁሉም ወዳዘጋጀህላቸው ቦታ ሄዱ።
9 ውኃዎቹ አልፈው እንዳይሄዱ፣እንደገናም ምድርን እንዳይሸፍኑ ወሰን አበጀህላቸው።+
10 ምንጮችን ወደ ሸለቆዎች* ይልካል፤በተራሮች መካከል ይፈስሳሉ።
11 የዱር አራዊት ሁሉ ከዚያ ይጠጣሉ፤የዱር አህዮችም ጥማቸውን ይቆርጣሉ።
12 የሰማይ ወፎች ከእነሱ በላይ ይሰፍራሉ፤በለመለሙ የዛፍ ቅርንጫፎች መካከል ሆነው ይዘምራሉ።
13 ከላይ ካሉት ክፍሎቹ ሆኖ ተራሮችን ያጠጣል።+
በሥራህ ፍሬ ምድር ረካች።+
14 ሣርን ለከብት፣አትክልትንም ለሰው ልጆች ጥቅም ያበቅላል፤+ይህን የሚያደርገው ምድር እህል እንድታስገኝ ነው፤
15 እንዲሁም የሰውን ልብ ደስ የሚያሰኝ የወይን ጠጅ፣+ፊትን የሚያበራ ዘይትናየሰውን ልብ የሚያበረታ እህል እንዲገኝ ነው።+
16 የይሖዋ ዛፎች፣ እሱ የተከላቸው አርዘ ሊባኖሶች፣ውኃ ጠጥተው ይረካሉ፤
17 በዚያ ወፎች ጎጇቸውን ይሠራሉ።
ራዛ*+ በጥድ ዛፎች ላይ ትኖራለች።
18 ረጃጅሞቹ ተራሮች፣ የተራራ ፍየሎች+ መኖሪያ ናቸው፤ቋጥኞቹ የሽኮኮዎች+ መሸሸጊያ ናቸው።
19 ጊዜያትን ለመለየት ጨረቃን ሠራ፤ፀሐይ የምትጠልቅበትን ጊዜ በሚገባ ታውቃለች።+
20 ጨለማን ታመጣለህ፤ ሌሊትም ይሆናል፤+በዚህ ጊዜ በጫካ የሚኖሩ አራዊት ሁሉ ወጥተው ይንቀሳቀሳሉ።
21 ደቦል አንበሶች አደን ለማግኘት ያገሳሉ፤+ምግባቸውንም ከአምላክ ይሻሉ።+
22 ፀሐይ ስትወጣ፣ተመልሰው በየጎሬአቸው ይተኛሉ።
23 ሰውም ወደ ሥራው ተሰማርቶእስኪመሽ ድረስ ሲሠራ ይውላል።
24 ይሖዋ ሆይ፣ ሥራህ ምንኛ ብዙ ነው!+
ሁሉንም በጥበብ ሠራህ።+
ምድር በፈጠርካቸው ነገሮች ተሞልታለች።
25 ባሕሩ እጅግ ትልቅና ሰፊ ነው፤በዚያ ስፍር ቁጥር የሌላቸው ትናንሽም ሆኑ ትላልቅ ሕያዋን ነገሮች ይርመሰመሳሉ።+
26 በዚያም መርከቦች ይጓዛሉ፤በዚያ እንዲጫወት የፈጠርከው ሌዋታንም*+ በውስጡ ይሄዳል።
27 በወቅቱ ምግባቸውን እንድትሰጣቸው፣ሁሉም አንተን ይጠባበቃሉ።+
28 አንተ የምትሰጣቸውን ይሰበስባሉ።+
እጅህን ስትከፍት መልካም ነገሮችን ይጠግባሉ።+
29 ፊትህን ስትሰውር ይታወካሉ።
መንፈሳቸውን ከወሰድክ ይሞታሉ፤ ወደ አፈርም ይመለሳሉ።+
30 መንፈስህን ከላክ ይፈጠራሉ፤+የምድርንም ገጽ ታድሳለህ።
31 የይሖዋ ክብር ለዘላለም ይኖራል።
ይሖዋ በሥራው ሐሴት ያደርጋል።+
32 ምድርን ሲመለከት ትንቀጠቀጣለች፤ተራሮችን ሲነካ ይጨሳሉ።+
33 በሕይወቴ ዘመን ሁሉ ለይሖዋ እዘምራለሁ፤+በሕይወት እስካለሁ ድረስ ለአምላኬ የውዳሴ መዝሙር እዘምራለሁ።+
34 ሐሳቤ እሱን የሚያስደስት ይሁን።*
እኔም በይሖዋ ሐሴት አደርጋለሁ።
35 ኃጢአተኞች ከምድር ይጠፋሉ፤ክፉዎችም ከእንግዲህ አይገኙም።+
ይሖዋን ላወድስ።* ያህን አወድሱ!*
የግርጌ ማስታወሻዎች
^ ወይም “ክብርንና።”
^ ወይም “ነፍሴ ይሖዋን ታወድስ።”
^ ቃል በቃል “በውኃዎቹ ውስጥ።”
^ ወይም “ደረቅ ወንዞች።”
^ ባለ ረጃጅም እግር ትልቅ አሞራ።
^ የቃላት መፍቻውን ተመልከት።
^ “ስለ እሱ የማሰላስለው ነገር ደስ የሚያሰኝ ይሁን” ማለትም ሊሆን ይችላል።
^ ወይም “ነፍሴ ይሖዋን ታወድስ።”
^ ወይም “ሃሌሉያህ!” “ያህ” የይሖዋ ስም አጭር መጠሪያ ነው።
