ခရစ်ယာန်များသည် အခြားသူများကို ဟောပြောသင့်သလော
သမ္မာကျမ်းစာရှုထောင့်
ခရစ်ယာန်များသည် အခြားသူများကို ဟောပြောသင့်သလော
သင် ကြီးပြင်းလာသည့်ဝန်းကျင် သို့မဟုတ် ယဉ်ကျေးမှုက မိသားစု သို့မဟုတ် ချာ့ခ်ျပြင်ပ၌ ဘာသာရေးအကြောင်း ဆွေးနွေးပြောဆိုခြင်းမပြုရဟု ပြဋ္ဌာန်းကောင်းပြဋ္ဌာန်းမည်။ ထို့ကြောင့် လူတစ်ဦးသည် ကျမ်းစာကိုကိုင်၍ သင့်အိမ်သို့ မပြောမဆိုရောက်လာပါက သင်စိတ်အနှောင့်အယှက်ဖြစ်ပေမည်။ အချို့သူများ ဤသို့ရှုမြင်ကြခြင်းမှာ ဘာသာရေးသမိုင်းတွင် လူတို့အား ကယ်တင်ရေးဟူသော ကင်ပိန်းများကိုဗန်းပြပြီး အကြမ်းဖက်လုပ်ရပ်များ လုပ်ဆောင်ခဲ့သောကြောင့်ဖြစ်သည်။
အလုံးအရင်းဖြင့် လူတို့ဘာသာပြောင်းကြခြင်းသည် ခရစ်တော်အားချစ်သောကြောင့်မဟုတ်ဘဲ ဓားမိုးခံရသောကြောင့်ဖြစ်ကြောင်း နိုင်ငံများစွာ၏သမိုင်းက ဖော်ပြသည်။ များစွာသောသူတို့သည် နှိပ်စက်ညှဉ်းပန်းသူများ၏ ဘာသာသို့ပြောင်းဝင်မည့်အစား ပုန်းရှောင်ခဲ့ကြသည်၊ နေအိမ်နှင့် တိုင်းပြည်ကိုစွန့်ခွာခဲ့ကြသည် သို့မဟုတ် အသက်ပင် ဆုံးရှုံးခံ—အချို့တို့မှာ သစ်တိုင်ပေါ်မီးရှို့သတ်ဖြတ်ခြင်းခံ—ခဲ့ကြသည်။
ဤသို့အတင်းအကျပ် ဘာသာပြောင်းစေသည့်လုပ်ရပ်များကို မှုတ်သွင်းခံကျမ်းစောင်များက မထောက်ခံပါ။ သို့ဖြစ်လျှင် အခြားသူများအား မိမိ၏ဘာသာရေးယုံကြည်ချက်များ ဝေမျှခြင်းကို ယင်းက တားမြစ်သလော။ သမ္မာကျမ်းစာကိုယ်တိုင်က အဖြေပေးပါသည်။
အခွင့်အာဏာဖြင့်သွန်သင်
ဦးဆုံး ယေရှုခရစ်ချမှတ်ခဲ့သော စံနမူနာကို သုံးသပ်ကြည့်ပါ။ ကိုယ်တော်သည် နားဆင်သူများ၏အသက်တာကို ဩဇာလွှမ်းမိုးခဲ့သော ကျွမ်းကျင်ပိုင်နိုင်သည့် ဆရာတစ်ဦးဖြစ်သည်။ (ယောဟန် ၁၃:၁၃၊ ၁၅) တောင်ပေါ်တရားတော်တွင် ကိုယ်တော်၏သွန်သင်ချက်များသည် ရိုးရှင်းသော်လည်း တန်ခိုးပါ၏။ အကျိုးဆက်မှာ ကိုယ်တော်အား နားဆင်သူတို့သည် “အလွန်အံ့သြကြ၏။ အကြောင်းမူကား၊ ကျမ်းပြုဆရာနည်းတူမဟုတ်၊ အစိုးရသောသူနည်းတူ ဆုံးမ . . . တော်မူ၏။” (မဿဲ ၇:၂၈၊ ၂၉) အနှစ် ၂,၀၀၀ ခန့်လွန်ပြီးနောက် ကိုယ်တော်၏သွန်သင်ချက်များသည် ယင်းကို ဆန်းစစ်သုံးသပ်သူများ၏အသက်တာများအပေါ် ဩဇာလွှမ်းမိုးဆဲဖြစ်သည်။ ဤအချက်ကိုအတည်ပြုရာ၌ ပါမောက္ခ ဟန်းစ် ဒီတာ ဘက်ဇ်က “တောင်ပေါ်တရားတော်၏ ဩဇာညောင်းမှုသည် ဂျူးဘာသာနှင့် ခရစ်ယာန်ဘာသာ၏နယ်သတ်မျဉ်းကို သို့မဟုတ် အနောက်တိုင်းယဉ်ကျေးမှုကိုပင် ကျော်လွန် အကျိုးသက်ရောက်မှုရှိသည်” ဟုမှတ်ချက်ချခဲ့သည်။
ကောင်းကင်သို့ မတက်ကြွမီကလေးတွင် ယေရှုက ကိုယ်တော်အစပြုခဲ့သော သွန်သင်ခြင်းလုပ်ငန်းသည် မိမိသေဆုံးပြီးနောက် ဆက်တည်ရှိနေပြီး ပို၍ပင် တွင်ကျယ်လာမည်ဖြစ်ကြောင်း မိန့်မှာခဲ့သည်။ (ယောဟန် ၁၄:၁၂) လူမျိုးအပေါင်းမှလူတို့ထံသွားပြီး ကိုယ်တော်မိန့်မှာခဲ့သော ‘ပညတ်တော်တို့ကို စောင့်ရှောက်စေခြင်းငှာ သွန်သင်ပေး’ ရန် တပည့်များကို ကိုယ်တော်ညွှန်ကြားခဲ့သည်။ ဤတာဝန်၏အဓိကရည်ရွယ်ချက်ကို ထိုဖော်ပြချက်၌ ယေရှုဤသို့ရှင်းပြခဲ့သည်– “သင်တို့သွား၍ . . . တပည့်ဖြစ်စေ . . . ကြလော့။”—မဿဲ ၂၈:၁၉၊ ၂၀; တမန်တော် ၁:၈။
တမန်တော်ပေါလု၏ပုံနမူနာကိုလည်း သုံးသပ်ကြည့်ပါ။ သူကိုယ်တိုင် ခရစ်ယာန်ဘာသာသို့ ပြောင်းဝင်လာပြီးနောက် သူတွေ့ရှိထားခါစ ယုံကြည်ချက်ကို မရှက်မကြောက်ဝေမျှခဲ့သည်။ (တမန်တော် ၉:၁၇-၁၉၊ ၂၂) တရားဇရပ်များတွင် ဟောပြော၍ “ခရစ်တော်သည် အသေခံရမည်။ သေခြင်းမှထမြောက်ရမည် . . . ဟူသော အကြောင်းအရာတို့ကို [“အထောက်အထားများဖြင့်၊” ကဘ]” သက်သေထူခြင်းသည် ပေါလု၏ထုံးစံဖြစ်ခဲ့သည်။ သူသည် “ယုဒလူနှင့် ဟေလသလူတို့ကို ဖြားယောင်းသွေးဆောင်” ရန် “ကျမ်းစာကိုအမှီပြု၍ ထိုသူတို့နှင့်” ကျွမ်းကျင်လိမ္မာစွာ “ဆွေးနွေးနှီးနှော” ခဲ့သည်။ အကိုးအကားစာအုပ်တစ်အုပ်အရ “သွေးဆောင်” အတွက်အသုံးပြုထားသော ဂရိစကားလုံးသည် “ကျိုးကြောင်းဆင်ခြင်မှု သို့မဟုတ် ကျင့်ဝတ်ဆိုင်ရာသုံးသပ်မှုများ၏သြဇာလွှမ်းမိုးမှုဖြင့် စိတ်သဘောထားပြောင်းလဲစေခြင်း” ဟူ၍အဓိပ္ပာယ်ရှိသည်။ ပေါလုသည် ဤသို့သွေးဆောင်၍ ကျိုးကြောင်းဆင်ခြင်တတ်သောကြောင့် သူသည် “လူအပေါင်းတို့ကို ဖြားယောင်းသွေးဆောင် [“၍ ခံယူချက်ပြောင်းစေခဲ့၊” ကဘ] သည်။—တမန်တော် ၁၅:၃; ၁၇:၁-၄၊ ၁၇; ၁၈:၄; ၁၉:၂၆။
အကျပ်ကိုင်ခြင်း သို့မဟုတ် သွေးဆောင်ခြင်း—မည်သည့်နည်းဖြင့်နည်း
မျက်မှောက်ခေတ်တွင် “ဘာသာပြောင်းစေခြင်း” ဟူသောဝေါဟာရကို ဘာသာတစ်မျိုးမှ နောက်တစ်မျိုးသို့ အတင်းအကျပ်ပြောင်းစေသည့်အဓိပ္ပာယ်ဖြင့် အသုံးပြုကြပြီဖြစ်သည်။ ဤသို့သောအလေ့အကျင့်ကို သမ္မာကျမ်းစာ မထောက်ခံပါ။ ယင်းအစား လူတို့သည် မည်သို့အသက်ရှင်မည်ကို ကိုယ်တိုင်ရွေးချယ်ရန် အခွင့်အရေး၊ တာဝန်များနှင့်အတူ လွတ်လပ်စွာဆုံးဖြတ်ပိုင်ခွင့်ရှိသူများအဖြစ် ဖန်ဆင်းခံရကြောင်း သွန်သင်ပေးသည်။ ဤတွင် ဘုရားသခင်အား မည်သို့ဝတ်ပြုမည်ဟူသောဆုံးဖြတ်ချက်လည်း ပါဝင်သည်။—တရားဟောရာ ၃၀:၁၉၊ ၂၀; ယောရှု ၂၄:၁၅။
မိမိ၏အဆိုအမိန့်များကိုလက်ခံရန် လူတစ်ဦးကို အကျပ်ကိုင်ဖို့ အံ့ဖွယ်တန်ခိုးတော်နှင့် အခွင့်အာဏာကို တစ်ခါမျှအသုံးမပြုဘဲနေခြင်းဖြင့် ယေရှုသည် ဘုရားသခင်ပေးသော ဤအခွင့်အရေးကို လေးစားခဲ့သည်။ (ယောဟန် ၆:၆၆-၆၉) နားဆင်သူတို့၏ နှလုံးထဲရောက်စေဖို့ရည်ရွယ်ချက်ဖြင့် ခိုင်လုံသောကျိုးကြောင်းဆင်ခြင်မှု၊ ပုံဥပမာများ၊ သဘောထားမေးခွန်းများကို အသုံးပြုခြင်းအားဖြင့် သူတို့ကို ကိုယ်တော်လှုံ့ဆော်ပေးခဲ့သည်။ (မဿဲ ၁၃:၃၄; ၂၂:၄၁-၄၆; လုကာ ၁၀:၃၆) သူတစ်ပါးကို အလားတူလေးစားမှုတင်ပြရန် မိမိ၏တပည့်များကို ယေရှုသင်ကြားပေးခဲ့သည်။—မဿဲ ၁၀:၁၄။
ပေါလုသည် သူ၏ဓမ္မအမှုတွင် ယေရှုကို စံပြအဖြစ်ထားခဲ့ကြောင်း ထင်ရှားပါသည်။ နားဆင်သူများကို ကျမ်းစာထဲမှ ခိုင်လုံသောကျိုးကြောင်းဆင်ခြင်မှုဖြင့် သွေးဆောင်စဉ်တွင် ပေါလုသည် အခြားသူများ၏ခံစားချက်များနှင့် ရှုမြင်ပုံများကို လေးစားမှုပြခဲ့သည်။ (တမန်တော် ၁၇:၂၂၊ ၂၃၊ ၃၂) ကျွန်ုပ်တို့၏ဖန်ဆင်းရှင်အား တက်တက်ကြွကြွအမှုထမ်းခြင်းသည် ဘုရားသခင်နှင့် ခရစ်တော်ကို ချစ်သောကြောင့်ဖြစ်ရမည်ကို သူနားလည်ခဲ့သည်။ (ယောဟန် ၃:၁၆; ၂၁:၁၅-၁၇) ထို့ကြောင့် ကျွန်ုပ်တို့ကိုယ်ပိုင် ဆုံးဖြတ်ချက်ဖြစ်ရမည်။
ကိုယ်ပိုင်ဆုံးဖြတ်ချက်
အဘယ်အိမ်ကိုဝယ်မည်၊ အဘယ်တွင် အလုပ်လုပ်၍ သားသမီးများကို မည်သို့ကျွေးမွေးပြုစုမည် စသောအဓိကကျသည့် ဘဝဆုံးဖြတ်ချက်များကိုချသည့်အခါ ဆင်ခြင်ဉာဏ်ရှိသူများသည် စိတ်ကူးပေါက်ရာမပြုလုပ်ကြပါ။ သူတို့စိတ်ကြိုက်ရွေးချယ်ပြီး မိမိတို့၏တွေ့ရှိချက်များကို စဉ်းစားဆင်ခြင်ကာ အကြံဉာဏ်တောင်းကြပေမည်။ ဤအရာများကို ထည့်သွင်းစဉ်းစားပြီးနောက်မှသာ သူတို့ဆုံးဖြတ်ချက်ချကြမည်။
ဘုရားသခင်အား မည်သို့ဝတ်ပြုကိုးကွယ်သင့်သည်ဟူသော ဆုံးဖြတ်ချက်သည် မည်သည့်ဘဝဆုံးဖြတ်ချက်မဆိုထက် ကျွန်ုပ်တို့၏အချိန်နှင့် အားစိုက်ထုတ်မှုကို ပို၍ရထိုက်ပါသည်။ ယင်းသည် ယခု ကျွန်ုပ်တို့၏အသက်ရှင်နေထိုင်ပုံနှင့် သာ၍အရေးကြီးသည်မှာ အနာဂတ်တွင် ကျွန်ုပ်တို့၏ထာဝရအသက် မျှော်လင့်ချက်ကို အကျိုးသက်ရောက်ပါလိမ့်မည်။ ဤအချက်ကို ပထမရာစုမှ ဗေရိမြို့သားခရစ်ယာန်များ ရှင်းလင်းစွာသဘောပေါက်နားလည်ခဲ့ကြသည်။ သတင်းကောင်းကို သူတို့အား တမန်တော်ပေါလုကိုယ်တိုင် ရှင်းပြခဲ့သည့်တိုင် မိမိတို့သွန်သင်ခံနေရသောအရာများသည် မှန်ကြောင်းသေချာစေဖို့ ကျမ်းစာကို နေ့စဉ် အသေအချာဆန်းစစ်ခဲ့ကြသည်။ ရလဒ်အနေနှင့် “ယုဒလူအမျိုးတို့သည် ယုံကြည်ခြင်းသို့ရောက်ကြ၏။”—တမန်တော် ၁၇:၁၁၊ ၁၂။
ယေရှုစီစဉ်ခဲ့သော သွန်သင်ခြင်းနှင့် တပည့်ဖြစ်စေခြင်းလုပ်ငန်းကို ယနေ့ ယေဟောဝါသက်သေများ ဆက်လက်ဆောင်ရွက်နေကြသည်။ (မဿဲ ၂၄:၁၄) ကိုယ်ပိုင်ဘာသာတရားရှိသော အခြားသူတို့၏အခွင့်အရေးကို သူတို့လေးစားကြသည်။ သို့သော် မိမိတို့၏ဘာသာရေးခံယူချက်များကို သူတစ်ပါးအားဝေမျှပေးသောအခါ သမ္မာကျမ်းစာပါ စံနမူနာကို သူတို့လိုက်လျှောက်ကြသည်။ အသက်ကယ်သည့်လုပ်ငန်းအဖြစ် သူတို့ယူမှတ်ရာကို ကျမ်းစာမှ ရိုးရိုးသားသားကျိုးကြောင်းဆင်ခြင်ပြကြပါသည်။—ယောဟန် ၁၇:၃; ၁ တိမောသေ ၄:၁၆။