“ስምህ ይሖዋ የሆነው አንተ፣ አዎ፣ አንተ ብቻ በመላው ምድር ላይ ልዑል እንደሆንክ ሰዎች ይወቁ።”—መዝሙር 83:18

መጽሐፍ ቅዱስ፣ እውነተኛው አምላክ ይሖዋ ብቻ እንደሆነ ያስተምራል። ጽንፈ ዓለምንም ሆነ ሕይወት ያላቸውን ነገሮች ሁሉ የፈጠረው እሱ ነው። መመለክ ያለበት እሱ ብቻ ነው።—ራእይ 4:11

“አምላክ ፍቅር ነው።”—1 ዮሐንስ 4:8

ይሖዋ በመጽሐፍ ቅዱስና በዙሪያችን ባሉ የፍጥረት ሥራዎቹ አማካኝነት ባሕርያቱን ገልጾልናል። ዋነኛ ባሕርይው ፍቅር ነው። ፍቅር የማንነቱ መገለጫ ነው። ስለ ይሖዋ ይበልጥ ባወቅን መጠን ይበልጥ እየወደድነው እንሄዳለን።

“አንተ . . . ይቅር ለማለት ዝግጁ [ነህ]።”—ነህምያ 9:17

ይሖዋ ፍጹም እንዳልሆንን ያውቃል። ስለዚህ እኛን “ይቅር ለማለት ዝግጁ” ነው። በጥፋታችን እንደተጸጸትን ከነገርነውና መጥፎ ነገር ማድረጋችንን ለማቆም የምንችለውን ሁሉ ካደረግን ይቅር ይለናል፤ የቀድሞ ኃጢአታችንን እንደገና አያነሳብንም።—መዝሙር 103:12, 13

“ይሖዋ ለሚጠሩት ሁሉ፣ . . . ቅርብ ነው። . . . እርዳታ ለማግኘት የሚያሰሙትንም ጩኸት ይሰማል።”—መዝሙር 145:18, 19

ይሖዋ ለየት ያሉ የአምልኮ ሥርዓቶች በመፈጸም ወይም የተለያዩ ሃይማኖታዊ ምስሎች ተጠቅመን እንድናመልከው አይጠብቅብንም። አፍቃሪ የሆኑ ወላጆች ልጆቻቸው ሲናገሩ እንደሚያዳምጧቸው ሁሉ እሱም ስንጸልይ ያዳምጠናል።