Sáàmù 44:1-26
Sí olùdarí. Ti àwọn ọmọ Kórà.+ Másíkílì.*
44 Ọlọ́run, a ti fi etí wa gbọ́,Àwọn baba ńlá wa ti ròyìn fún wa,+Àwọn ohun tí o ṣe nígbà ayé wọn,Ní àwọn ọjọ́ tó ti pẹ́.
2 Ọwọ́ rẹ ni o fi lé àwọn orílẹ̀-èdè jáde,+O sì mú kí àwọn baba ńlá wa máa gbé níbẹ̀.+
O fọ́ àwọn orílẹ̀-èdè, o sì lé wọn jáde.+
3 Kì í ṣe idà wọn ni wọ́n fi gba ilẹ̀ náà,+Kì í sì í ṣe apá wọn ló mú kí wọ́n ṣẹ́gun.+
Kàkà bẹ́ẹ̀, ọwọ́ ọ̀tún rẹ àti apá rẹ+ àti ìmọ́lẹ̀ ojú rẹ ló ṣe é,Nítorí pé inú rẹ dùn sí wọn.+
4 Ìwọ Ọlọ́run ni Ọba mi;+Pàṣẹ ìṣẹ́gun pípé fún Jékọ́bù.*
5 Agbára rẹ la ó fi lé àwọn ọ̀tá wa pa dà;+Orúkọ rẹ la ó fi tẹ àwọn tó dìde sí wa rẹ́.+
6 Torí mi ò gbẹ́kẹ̀ lé ọfà* mi,Idà mi ò sì lè gbà mí là.+
7 Ìwọ lo gbà wá lọ́wọ́ àwọn ọ̀tá wa,+Ìwọ lo sì kó ìtìjú bá àwọn tó kórìíra wa.
8 A ó máa yin Ọlọ́run láti àárọ̀ ṣúlẹ̀,A ó sì máa fi ọpẹ́ fún orúkọ rẹ títí láé. (Sélà)
9 Àmọ́ ní báyìí, o ti ta wá nù, o ti kó ìtìjú bá wa,O ò sì bá àwọn ọmọ ogun wa jáde.
10 Ò ń mú kí a sá pa dà níwájú àwọn ọ̀tá wa;+Àwọn tó kórìíra wa ń kó ohun tí wọ́n fẹ́.
11 O fi wá lé wọn lọ́wọ́ kí wọ́n lè pa wá jẹ bí àgùntàn;O ti tú wa ká sáàárín àwọn orílẹ̀-èdè.+
12 O ta àwọn èèyàn rẹ lọ́pọ̀;+O ò jẹ èrè kankan lórí wọn.*
13 O sọ wá di ẹni ẹ̀gàn lójú àwọn aládùúgbò wa,Ẹni ẹ̀sín àti ẹni yẹ̀yẹ́ lójú àwọn tó yí wa ká.
14 O sọ wá di ẹni ẹ̀gàn* láàárín àwọn orílẹ̀-èdè,+Ẹni tí àwọn èèyàn ń rí, tí wọ́n ń mi orí.
15 Ẹ̀tẹ́ bá mi láti àárọ̀ ṣúlẹ̀,Ìtìjú mi sì ti bò mí mọ́lẹ̀,
16 Torí ẹ̀sín tí wọ́n ń fi mí ṣe àti èébú wọn,Nítorí pé ọ̀tá wa ń gbẹ̀san lára wa.
17 Gbogbo èyí ti ṣẹlẹ̀ sí wa, síbẹ̀ a kò gbàgbé rẹ,A kò sì da májẹ̀mú rẹ.+
18 Ọkàn wa kò kúrò lọ́dọ̀ rẹ;Ẹsẹ̀ wa kò yà kúrò ní ọ̀nà rẹ.
19 Àmọ́ o ti tẹ̀ wá rẹ́ níbi tí àwọn ajáko* ń gbé;O ti fi òkùnkùn biribiri bò wá mọ́lẹ̀.
20 Ká ní a ti gbàgbé orúkọ Ọlọ́run waTàbí tí a tẹ́wọ́ àdúrà sí ọlọ́run àjèjì,
21 Ṣé Ọlọ́run kò ní mọ̀ ni?
Ó mọ àwọn àṣírí tó wà nínú ọkàn.+
22 Torí rẹ ni wọ́n ṣe ń pa wá láti àárọ̀ ṣúlẹ̀;Wọ́n ti kà wá sí àgùntàn tó wà fún pípa.+
23 Dìde. Kí ló dé tí o ṣì fi ń sùn, Jèhófà?+
Jí! Má ṣe ta wá nù títí láé.+
24 Kí ló dé tí o fi fojú rẹ pa mọ́?
Kí ló dé tí o fi gbàgbé ìyà tó ń jẹ wá àti ìnira tó bá wa?
25 Nítorí wọ́n ti bá wa* kanlẹ̀;Wọ́n sì ti tẹ̀ wá mọ́lẹ̀.+
26 Dìde nítorí ìwọ ni olùrànlọ́wọ́ wa!+
Gbà wá sílẹ̀* nítorí ìfẹ́ rẹ tí kì í yẹ̀.+
Àlàyé Ìsàlẹ̀ Ìwé
^ Wo Àlàyé Ọ̀rọ̀.
^ Tàbí “Fún Jékọ́bù ní ìgbàlà ńlá.”
^ Ní Héb., “ọrun.”
^ Tàbí “látinú iye owó wọn.”
^ Ní Héb., “àfipòwe.”
^ Tàbí “akátá.”
^ Tàbí “ọkàn wa.”
^ Ní Héb., “Rà wá pa dà.”